Æрæджы уæрæсейаг ерыстæй ирыстойнаг спортсментæ сластой 12 майданы
Нæ республикæйы джиу-джитсуйы федераци фæзынд 27 азы размæ. У япойнаг хъæбысхæсты хуызтæй иу. Æрæджы уæрæсейаг ерыстæй ирыстойнаг спортсментæ сластой 12 майданы. Уæлахиздзауты тыххæй бæлвырддæр радзурдзæн Тъехты Элинæ.
Джиу – джитсу у япойнаг хъæбысхæсты хуызтæй иу. Ацы спорты хуыз нæ республикæйы фæзынд æрæджы, фæлæ дзы ныридæгæн нæ спортсментæм ис æнтыстдзинæдтæ. Æрæджы не мзæххонтæ уæрæсейаг ерыстæй сластой 12 майданы. Æмæ уыцы хабар диссаг нæу, уымæн æмæ джиу – джитсу у дзюдойы хуызæн. Дзюдо та, куыд æй зонæм, афтæмæй нæ республикæйæн зонгæ спорты хуыз у.
Уæзæгты Янæ куыд зæгъы, афтæмæй йын йæ спортивон æмбæлттæ ссисты дыккаг бинонты хуызæн. Се ххуысы руаджы чызгæн ис бирæ æнтыстдзинæдтæ. Æрæджы Уæрæсейаг ерысты бацахста 3-аг бынат. Куыд зæгъы, афтæмæй æрлæууынмæ нæ хъавы. Йæхиуыл кусдзæн, цæмæй йын хуыздæр æвдисæнтæ уа, уый тыххæй.
Алы бон тренировкæ куы кæнай, уæд схиздзынæ спорты бæрзæндтæм – зæгъы Бадриаты Аслæнбег. Лæппуйæн япойнаг хъæбысхæст йæ зæрдæмæ тынг фæцыд. Ерыстæм дæр ацыд, цæмæй йæхи бафæлвара, уый тыххæй.
Нæ республикæйы спортсментæ архайынц бирæ ерысты. Кæд иуæй – иутæ семæ 1-аг бынæттæ не сласынц, уæддæр ууыл æрлæууынмæ нæ хъавынц.
