Мадзалы архайджытæ зæрдиагæй байхъуыстой Эльбрусы æмдзæвгæтæм
Йæ цард бафæзминаг, йе сфæлдыст рæнхъытæ та сæхимæ æлвасынц сæ мидисæй æмæ аив дзырдæй. Уæрæсейы Федерацийы фысджыты цæдисы уæнг, Скъодтаты Эльбрусы юбилейы фæдыл сфæлдыстадон изæры чи архайдта, уыдоны хъуыдытæ уымæн æвдисæн. Мадзалы уыд не сфæлдыстадон къорд дæр, ныхасы бар Сосранты Жаннæйæн.
Цæгат Ирыстоны мыхуыры æмæ дзыллон коммуникациты комитеты сæрдары хæстæ æххæстгæнæг Гæбæлаты Мæдинæйы ныхæстыл дыууæ ничи зæгъдзæн, Цæгат Ирыстоны культурæйы сгуыхт кусæг, Уæрæсейы фысджыты цæдисы уæнг, поэт, прозаик, драматург, публицист, тæлмацгæнæг, республикон литературон аивадон журнал «Ирæф»-ы сæйраг редактор Скъодтаты Эльбрусы чи зоны, уыдонæй. Эльбрусæн ацы аз у юбилейон æмæ йын бантыст йæ ныффыст æрмæджытæй Ирыстоны сфæлдыстадон къæбицмæ æвæрæн бахæссын.
Йæ юбилейы, стæй йæ бирæ сарæзт хъуыддæгты тыххæй раарфæ кæнынмæ, Национ наукон библиотекæмæ æрбацыдысты Скъодтаты Эльбрусы зонгæтæ, æмкусджытæ, йæ сфæлдыстадмæ йын куыдфæндыйы цæстæй чи нæ кæсы, уыдон. Кæсæг-Балхъары фысджыты цæдисы минæвæрттæ Скъодтайы фыртыл, арфæтимæ сæмбæлын кодтой кадджын хæрзиуæг — Кайсын Кулиевы майдан.
Скъодтаты Эльбрусы æнæ æрхъуыдыйæ нæ ныууагътой йæ райгуырæн хъæу Сырх–Дыгуры, стæй Æрæфы районы разамынд, арфæйы фыстæджытæ ма райста Националон иртæстыты институт «Курчатовский институт»-ы директор Хъамболты Марат æмæ Цæгат Ирыстоны сæргълæууæг æмæ хицауады администрацийы сæрдар Гобеты Ибрагимæй.
Мадзалы архайджытæ зæрдиагæй байхъуыстой Эльбрусы æмдзæвгæтæм. Уæдæ алы радзурæг дæр йæхи хуызы кæй æнкъары Скъодтайы фырты курдиат, уый та бæрæг дардта сæ хъуыдыты мидисыл.
Скъодтаты Эльбрусы юбилейон – сфæлдыстадон изæр рацыд уды хъармдзинады æнкъарæнтæй æххæстæй. Национ наукон библиотекæйы кусджыты зæрдиаг лæвар кæй фæцыд юбиляры, стæй мадзалмæ æрбацæуджыты зæрдæмæ, уый та гуырысхойаг нæ уыд. Цыбæр афæлгæстæй банкъарæн уыд сырх-дыгуйраг лæппу абоны бирæ хæрзиуджыты æмæ кады аккаг Скъодтаты Эльбрус куыдæй сси, уый.
