Афтæ Елхоты бирæвæрсыг колледжы æрмадзтæ ифтонг æрцæудзысты нырыккон кусæнгæрзтæй
Национ проектты архайд дæтты хорз гæнæнтæ. Афтæ Елхоты бирæвæрсыг колледжы æрмадзтæ ифтонг æрцæудзысты нырыккон кусæнгæрзтæй. Уый ахуырдзаутæн фадат ратдзæн сæ теоретикон зонындзинæдтæ практикон æгъдауæй фæфидардæр кæнынæн æмæ цардмæ дæсны специалисттæй рацæуынæн. Куыд цæттæ сты грантты ногдзинæдтæм, уый тыххæй радзурдзæн Моргуаты Ладæ.
Баликъоты Станиславы фæнды райсын машинæтæ цалцæггæнæджы дæсныйад, уымæ гæсгæ ахуыр кæнынмæ бацыд Елхоты бирæвæрсыг колледжмæ. Фарон архайдта конкурс WorldSkills Russia-йы æмæ дзы рамбылдта. Ныр та ма интернеты фæрцы йæхи цæттæ кæны 3-D кусæнгарзимæ архайын æмæ æнхъæлмæ кæсы, нырыккондæр техникæимæ кусыны фадат ын кæд уыдзæн, уымæ.
Хæстæгдæр рæстæг ацы æмæ æндæр нырыккондæр кусæнгæрзтæ фæзындзысты Елхоты бирæвæрсыг колледжы. Уый, сæрды ахуыргæнæндон цы грант рамбылдта, уый фæрцы. Ног техникæйæн цæттæ кæнынц æрмадзтæ дæр.
Цæлгæнæн дæр тагъд сифтонг кæндзысты ног кусæнгæрзтæй. Уым фидæны хæринаггæнджытæ сæхи фæлвардзысты дзадджын хæринæгтæ кæнынæй. Сæхи цæттæ кæндзысты дæсныйадæвдисæг конкурстæм. Ног техникæ сын æххуыс уыдзæн сæ фæлтæрддзинад фылдæр кæнынæн æмæ дунейы тенденцитæм хæстæгдæр уæвынæн.
Ног кусæнгæрзтыл ахуыр кæндзысты, ирвæзынгæнæджы дæсныйадыл чи ахуыр кæны, уыдоны дæр. Сифтонг сæ кæндзысты æппæт хъæугæ инвентарæй. Æфсæйнаг æмæ æндæр хъæбæр хомаг чи лыг кæны, ахæм хæсгард, уый фæндаггон фыдбылызы рæстæг у æнæмæнг хъæугæ дзаума. Фæзындзæн ма сæм къадæзхтыл бырыныл сæ фæлтæрдзинад кæм фидар кæндзысты, ахæм къул дæр. Ныр та уал тренировкæтæ кæнынц бæстыхайæн йæхиуыл. Елхоты бирæвæрсыг колледжы национ проект «Ахуырад»-ы архайы 2018-æм азы. Æмæ фарон Æрыдоны колледжимæ хаст æрцыд Уæрæсейы 175 хуыздæр ахуыргæндоны хыгъдмæ. Цы фæрæзтæ сын радих кодтой, уыдоны иумæйаг аргъ уыд 82 милуан соммæ хæстæг, уыдонæй 44 радих кодтой Елхотæн.
Гранттæ фадат дæттынц фидæны специалисттæн сæ ахуыры рæстæг хуыздæр техникон гæнæнтæ саразынæн æмæ сæ фидæны дæсны специалисттæ рауайынæн. Уый у хорз æвæрæн нæ сомбонæн.
