Стыр цалцæггæнæн куыстытæ бацыдысты сæ тæмæны
Ног ахуыры аз бирæ скъоладзаутæ райдайдзысты нырыккон кълæсты, ног партæты уæлхъус. Стыр цалцæггæнæн куыстытæ бацыдысты сæ тæмæны. Иуæй-иу ахуыргæнæндæтты та архайд цæуы æмгъуыдæй раздæр. Цавæр къæпхæны сты куыстытæ, уый базоныныл бацархайдта не сфæлдыстадон къорд, æмæ бæлвырддæр радзурдзæн Джыбызты Зæринæ.
Нырыккон ахуырады гæнæнтæ домынц ног дизайнерон уынаффæтæ. Дзæуджыхъæуы 4-æм гимназы директор не сфæлдыстадон къордæн равдыста йæ фидæны кабинет. Уыдзæн дзы стыр рудзгуытæ, цæмæй сывæллæттæ æппынæдзухдæр уыной ахуыргæнæндоны разамынды. Æмæ ахæм хъуыды бавæрдтой алы хъуыддаджы дæр. Хъуамæ лæппутæ æмæ чызджытæ скъоламæ цæуой зæрдæхъæлдзæгæй æмæ рухс æнкъарæнтимæ.
Скъолайы æрцæудзæн бирæ ивддзинæдтæ. Ивгъуыд дугæй ма дзы баззайдзæн агуыридурæй конд æддаг къул. Иннæ хъуыддæгтæ æрцæудзысты ивд – нырыккон, æдас, хæрзхъæд æрмæджытæ – уый иу. Стæй ма цымыдисаг архитектурон æрхъуыдыдзинæдтæ. Бæстыхай уыдзæн райдзаст æмæ хъарм. Уый тыххæй директор Цуциты Сослан, зæгъæн ис, æмæ æхсæвæй-бонæй вæййы гимназы. Подрядон организацийы куыстмæ, куы бахъæуа, уæд бахæссы фиппаинæгтæ. Уыимæ хынцы ныййарджыты æмæ ахуыргæнджыты фæндонтæ дæр. Алцыдæр хъуамæ конд æрцæуа иттæг хорз.
Скъолаты директорты хъуыдымæ гæсгæ, ахсджиаг у подрядон организациимæ æмархайд кæнын. Кæд ахуыргæнæндæттæ федералон программæтæм гæсгæ цалцæг кæнынц, уæд дæр сæм цæуы бæстон цæстдард. Зæгъæм, Æхсæрысæры ахуырдзаутæ æмæ ныййарджытæ ракуырдтой, цæмæй се скъолайы къултæ ахуырст æрцæуой ирд хуызтæй.
Проектмæ гæсгæ Æхсæрысæры скъола эксплуатацийы хъуамæ радтой октябры кæрон. Фæлæ подрядчик нысан кæны куыстытæ ног ахуыры азы райдианмæ фæуын.
Ольгинскæйы астæуккаг скъолайы дæр цалцæггæнæн куыстытæ цæуынц фæткæй раздæр. Фæлæ бæстыхай у æртæуæладзыгон, æмæ бахъæудзæн фылдæр рæстæг. Скъолайы ахуыр кæны æртæ сæдæ адæймагæй фылдæр.
Абоны онг цалцæггæнæн куыстытæ цæуынц Цæгат Ирыстоны цыппор цыппар скъолайы. Уыдонæй дæс байгом кæндзысты ног ахуыры азы райдиан. Ноджыдæр ма дыууын фондз ахуыргæнæндоны сцæттæ уыдзысты октябрьмæ.
