филиал вгтрк государственная телерадиовещательная компания “Алания”

Ног ахуыры азы агъоммæ Дзæуджыхъæуы ацыд молебен. Традицимæ гæсгæ, уыцы мадзал бирæ азты дæргъы фæцæуы Колыты Аксойы номыл скверы. Зындгонд рухстауæг ирон æвзагмæ тæлмац æмæ редакци кодта дины чингуытæ. Уымæй уæлдай ма Колыйы фырты æмдзæвгæтæ систы фыццаг поэтикон уацмыстæ ирон æвзагыл. 1862-æм азы та йæхи фæрæзтæй байгом кодта райдайæн скъола чызджытæн. Абон йæ ном хæссы Дзæуджыхъæуы чырыстон гимназ. Йæ цыртдзæвæны цурмæ æрбацыдысты бирæ чырыстон адæм. Уыдон та – Дзæуджыхъæуы скъолаты ахуырдзаутæ, ахуыргæнджытæ æмæ педагогтæ. Фадат сын уыд канд ног ахуыры азы тыххæй скуывынæн нæ, фæлæ ма Дзæуджыхъæуккаг æмæ Алайнаг алчыры арфæтæ райсынæн дæр.