Уыдоны *хсæн ис Хохы Саниба дæр
«Нымæцон æнæмхуызонад иуварс кæныны» федералон программæмæ гæсгæ республикæйы 5 хъæуы фæзынд фæстаг фæлтæры чырæ бастдзинад æмæ тагъд интернет. Уыдоны *хсæн ис Хохы Саниба дæр. Бынæттон цæрджытæ æмæ амалхъом адæм куыд зæгъынц, афтæмæй ацы хъуыддаг ахсджиаг у. Адæмы цард æнцонвадатдæр кæны, хорзырдæм ахады туризмы райрæзтыл дæр. Бæлвырддæр радзурдзæн Хъайтмазты Дзерассæ.
Тагъд интернеты тыххæй ам раздæр хъуыды дæр нæ кодтой, абон дзы пайда кæныны фадат алкæмæндæр ис. Бынæттон цæрæг æмæ амалхъом адæймаг Кертанты Алан ам коттеджтæ аразын райдыдта 2 азы размæ. Хъуыды кæны, куыд зын уыдис æнæ бастдзинадæй, ныр та уавæр аивта. Алан коттеджтæ арендæйы дæтты республикæйы цæрджытæн æмæ уазджытæн.
Фæстаг фæлтæры чырæ бастдзинад Хохы Санибамæ бауагътой фарон, «нымæцон æнæмхуызонад иуварс кæныны» федералон программæмæ гæсгæ. Ацы хъæу республикæйы цæрджытæ дыккаг хаттæй равзæрстой хъæлæс кæныны хуызы паддзахадон лæггæдты порталы. 2023-æм азы не сфаг хъæлæстæ, фæлæ фарон ацы хъуыддаг къухы бафтыд. Хъæрмæдоны администрацийы сæргълæууæг Дзиуаты Георгий куыд зæгъы, афтæмæй уый хорзырдæм фæзындзæн туризмы райрæзтыл.
Национ нымæцон провайдеры специалисттæ уæззау хæххон уавæрты сæвæрдтой оптикон кабелы 19 километры. Стæй ма сарæзтой бындурон станцæ. Ныр ам интернеты тагъдад хæццæ кæны секундмæ 100 мегабитæй фылдæрмæ.
Федералон программæ æххæстгæнгæйæ тагъд интернет фæзынд 5 хъæуы. Хæстæг рæстæг ма йæ бауаддзысты ноджыдæр 2 хъæумæ.
Федералон программæ æххæстгонд цæудзæн 2030-æм азмæ æмæ аххæсдзæн Уæрæсейы æппæт регионтыл.
