Ахæм уынаффæ рахастой, æрæджы хъæуы уынгтæй иуы асфальт æвæрын кæй райдыдтой, уымæ гæсгæ.
Ныртæккæ Уæллаг Санибайы цæуы дондзæуæны бындурон рацарæзт. Ахæм уынаффæ рахастой, æрæджы хъæуы уынгтæй иуы асфальт æвæрын кæй райдыдтой, уымæ гæсгæ. Цалцæггæнæн куыстытæм се вæрæн бахастой бынæттон цæрджытæ дæр. Сæмбырд кодтой æхца ног хæтæл балхæнынæн. Ног дондзæуæн кæндзæн 35 хæдзарæн.
Уæллаг Санибайы дондзæуæн бындуронæй цалцæггонд рагæй уыди. Хæтæлтæ-иу аскъуыдысты мæй цалдæр хатты. Бынæттон администраци та-иу сæхи хъæппæрисæй бацархайдтой хæтæлтæ бампъузыныл. Æрæджы та хъæуы уынгтæй иуы райдыдтой асфальт æвæрын, æмæ хаст æрцыд уынаффæ, ног дондзæуæн сæвæрыны тыххæй. Ацы хъуыддагмæ се вæрæн бахастой бынæттон цæрджытæ дæр. Райдыдтой æхца æмбырд кæнын ног хæтæл балхæнынæн.Ног дондзæуæн хæтæл лæггад кæндзæн 35 хæдзарæн. Ныридæгæн æй се ппæтмæ дæр баиу кодтой. Хъæуы ма йæ иумæйаг хызмæ бауадзын. Ацы мæйы кæронмæ Плиты Иссæйы уынджы æвæрд æрцæудзæн ног асфальт.
Дондзæуæнты эксплуатацийы паддзахадон куыстуаты специалисттæ куыд зæгъынц, афтæмæй ахæм куыстытæ цæудзысты Горæтгæрон районы стыр хъæуты: Ногиры, Джызæлы, Архонкæйы æмæ æндæр рæтты. Цæмæй куыстытæ хæрзхъæд æмæ ахадгæ уой, уый тыххæй эксперттæ сидынц цæрджытæм, цæмæй афоныл фидой коммуналон лæггæдтæн, æмæ донæй ауæрдгæйæ пайда кæнын. Уæлдайдæр та сæрдыгон.
