Йæ саразыныл бакуыстой Хетæгкаты Къостайы номыл Цæгат Ирыстоны паддзахадон университеты ирон филологийы факультеты ахуыргæнджытæ æмæ студенттæ
Платформæ «Яндекс Тæлмацгæнæджы» рæхджы фæзындзæн ирон дзырдуат. Йæ саразыныл бакуыстой Хетæгкаты Къостайы номыл Цæгат Ирыстоны паддзахадон университеты ирон филологийы факультеты ахуыргæнджытæ æмæ студенттæ. Уæдæ йæм се вæрæн бахастой Цæгат Ирыстоны гуманитарон æмæ социалон иртæстыты институты кусджытæ. Æдæппæтæй ратæлмац кодтой 90 мин хъуыдыйадæй фылдæр. Тæлмац æмæ редакци кæнынæн уæлæмхасæн фæрæзыл бакуыстой IT-специалисттæ. Проект йæхæдæг та царды рауагътой национ политикæйы æмæ æддагон бастдзинæдты министрады хъæппæрисæй. Афтæмæй æххæстгонд цæуы «Ирон адæмы национ-культурон æууæлтæ хъахъхъæныны» программæ. Нырма уал кæронмæ рæхæццæ егъау куысты фыццаг къæпхæн.
