Цас адæм схъæлæс кодта, уымæ гæсгæ æппæтæй стырдæр процент равдыста Алагиры район
Президенты æвзæрстытæ цыдысты 3 боны. Республикæйы цæрджытæ активонæй хъæлæс кодтой уыдонæй алы бон дæр. Цас адæм схъæлæс кодта, уымæ гæсгæ æппæтæй стырдæр процент равдыста Алагиры район. Æвзæрстытæ куыд цыдысты, уый тыххæй бæлвырддæр радзурдзæн Хъайтмазты Дзерассæ.
Адæмон зарджытæ æмæ кæфтытæ. Бæстæйы президенты æвзæрстытæ Беслæны уыдысты æцæг бæрæгбонау. Æвзарæн хайады куыстой æхсæнадæмон цæстдарджытæ, сæ хыгъды – Италийæ дæр. 147-æм æвзарæн къамисы сæрдар Ирина Каниди куыд загъта, афтæмæй 3 боны дæр адæм активонæй цыдысты хъæлæс кæнынмæ.
Ирина Каниди – 147-æм æвзарæн къамисы сæрдар: “Явка избирателей очень высокая, избиратели проявляют колоссальную активность, приходят семьями, приходят бабушки с внуками, родители с детьми. Это радует, очень приятно”.
Æппæт категориты адæмæн дæр сæ хъæлæс радтыны фадæттæ саразын уыд, республикæйы æвзарæн къамисы сæйрагдæр хæстæй иу. Æвзарæн хайæдтæн сæ 90 процентæй фылдæр æххæст уыдысты пандустæй. Уавæртæ уыд, æвзæр кæнæ æппындæр чи нæ уыны, уыдонæн дæр. Афтæ Архонкæйы 1-æм скъолайы историйы æмæ æхсæнадзонынады ахуыргæнæг Николай Скрипец традицимæ гæсгæ æрбацыд участокмæ. Куыд зæгъы, афтæмæй йын уыдис, хæдзары схъæлæс кæныны фадат, фæлæ не сразы. Йæ фарсмæ бæрнон адæймаг, афтæмæй базонгæ кандидатты тыххæй информациимæ, æмæ се *ппæтимæ иумæ сæххæст кодта йæ граждайнаг хæс.
Архонкæйы æвзарæн хайады нысангонд уыдис 2 мин адæймагæй фылдæр. Ардæм йæ бинойнагимæ схъæлæс кæнынмæ æрбацыд станицæйы атаман Александр Кусей дæр.
Æвзæрстыты активонæй архайдтой парти «Иугонд Уæрæсе»-йы регионалон хайады минæвæрттæ. Республикæйы Парламенты депутат Едзойты Марат хъæлæс кæнынмæ æрбацыд Дзæуджыхъæуы 50-йæм скъолайы æвзарæн хайадмæ. Йæ ныхæстæм гæсгæ, ныртæккæ уæлдай ахсджиаг у, цæмæй алчидæр раст спайда кæна йæ конституцион барæй.
Йæ граждайнаг хæс сæххæст кодта «Иугонд Уæрæсейы Æрыгон Гвардийы» регионалон хайады разамонæг Саулохты Сæрмæт дæр. Æвзарæн хайадмæ æрбацыд йæ мадимæ æмæ йе *фсымæримæ. Куыд загъта, афтæмæй традицимæ гæсгæ, æппæт бинонтæй хъæлæс кæнынц.
Хъæлæс кæныны фæстаг бон уыд пресс-конференци. Журналисттимæ ныхас кодтой æвзарæн къамисы сæрдар Моргуаты Жаннæ æмæ Æхсæнадон палатæйы разамонæг. Нина Чиплакова куыд загъта, афтæмæй республикæйы бæстæйы президенты æвзæрстытæ ацыдысты закъонмæ гæсгæ.
Изæры 8 сахатыл республикæйы æппæт æвзарæн хайæдтæ æхгæд æрцыдысты. Къамисты уæнгтæ байгом кодтой сейф-пакеттæ æмæ урнæтæ æмæ райдыдтой нымайын хъæлæстæ. Цæгат Ирыстоны хъæлæсгæнджытæн сæ 91 процентæй фылдæр сæххæст кодтой сæ граждайнаг хæс. Активондæрæй сæхи равдыстой Алагиры районы цæрджытæ. Уым хъæлæс кæнынмæ æрбацыдысты æвзарджытæн сæ 94 процентæй фылдæр.
