Систа йæ Фазиль Искандеры радзырдтæм гæсгæ
3-æм февралы прокаты рацæудзæн Галазты Асланы аивадон киноныв «Детство Чика». Систа йæ Фазиль Искандеры радзырдтæм гæсгæ. Равдисдзысты йæ Дзæуджыхъæуы кинотеатр Алания Синемайы. Кинонывы æвдыст цæуы Абхази ивгъуыд æнусы 40 азты. Сæйраг хъайтар у 13 аздзыд лæппу Чик. Хуымæтæг советон скъоладзауы цард æвваст аивта, йæ фыды йын куы рцахстой, уæд. Лæппу бирæ зындзинæдтæ бавзæрста, фæлæ йæ удыхъæд нæ аивта. Киноуарзджытæ фендзысты Абхазийы диссаджы æрдз, стæй аргъ скæндзысты режиссеры бирæвæрсыг курдиатæн. Киноныв систой Дзæуджыхъæуы эксперименталон киностудийы, Уæрæсейы культурæйы министрады æххуысæй. Сæйраг рольты дзы хъазынц Давид Цулукия, Засеты Батраз, Милана Ломия, Хæтæгты Артур, Мæхъиты Сослан æмæ Николаус Мавроматидис.
