Ныхас цыди субъекты социалон-экономикон æмæ æхсæнадон-политикон рæзтыл, сæйрагдæр та национ проекттæ куыд æххæстгонд цæуынц, ууыл
Пятигорскы кусæг фембæлд уыди УФ-йы æххæстбарджын минæвар Цæгат Кавказы федералон зылды Юрий Чайка æмæ Цæгат Ирыстоны Сæргълæууæг Битарты Вячеславæн. Ныхас цыди субъекты социалон-экономикон æмæ æхсæнадон-политикон рæзтыл, сæйрагдæр та национ проекттæ куыд æххæстгонд цæуынц, ууыл. Ам зæгъын хъæуы уый, æмæ бæрнон адæм бæстонæй æркастысты 2025-æм азмæ, Цæгат Ирыстоны социалон-экономикон рæзты мадзæлтты пъланмæ цы ивддзинæдтæ хаст æрцыди, уыдонмæ. Баххæст æй кодтой 38 ног проектæй, иууылдæр ацæудзысты Беслæны. Се хсæн – республикæйы клиникон рынчындоны дæлстанцæйы, дыууæ рæвдауæндоны, скъолатæ æмæ ахуырады æндæр объектты арæзтад, дыууæ мин бынатæн чи у, ахæм стадионы цалцæг, парчы рацарæзт, культурæйы хæдзæртты, сфæлдыстадон центрты, фæндæгты æмæ цæрæнуæтты-коммуналон объектты рацарæзт. Уымæй уæлдай, хыгъдмæ бахастой цæрджыты социалон æгъдауæй хъахъхъæныны мадзæлттæ. Афтæ, 2004-æм азы теракты хъыгдардбаййафæг адæмæн æрвылаз хъуамæ дихгонд цæуа медицинон – реабилитацион æмæ санаторон-курортон мадзæлттæн материалон æххуыс. Фембæлды ахсджиаг фарста уыди регионы санитарон-эпидемиологон уавæр.
