Цæгат Ирыстоны паддзахадон университеты студенттимæ æмæ ахуыргæнджытимæ бабæрæг кодтой Цъæйы цъитийы экологон къахвæндаг
Радиотехникæйы, электроникæйы æмæ автоматикæйы уæрæсейаг технологон университеты студенттæ-волонтертæ æххуыс кæнынц Цæгат Ирыстоны аивдзинадыл куысты. Мæскуыйаг уазджытæ се вæрæн бахастой Фæскомцæдисон парчы зиумæ. Уымæй дарддæр сын бацæттæ кодтой ирхæфсæн программæ дæр – музейтæм экскурситæ æмæ хæхтæм балцытæ. Зæгъæм, ацы хатт Цæгат Ирыстоны паддзахадон университеты студенттимæ æмæ ахуыргæнджытимæ бабæрæг кодтой Цъæйы цъитийы экологон къахвæндаг. Уæвгæ та мæскуыйаг бархионты ахæм экспедицитæ арæзт цæуынц ныр 10 азæй фылдæр. Бæлвырддæр радзурдзæн Гæджиты Сослан.
Цъæйы комы цъитимæ фæндаг тынг гуыргъахъ нæу. Фæлæ уæддæр хъæуы къæрцъхъус уæвын. Уымæн æмæ фæсивæдæй ацы фæндагмæ бирæтæ рацыдысты фыццаг хатт. Раздæр уал чысыл инструктаж. Уый уæлдай ахсджиаг у, туристон къорд стыр куы вæййы, уæд. Цъæйы комы рæсугъддзинад йæхимæ лвасы алы бæлццоны дæр. Уымæ гæсгæ сисынц сæ телефонтæ, цæмæй æрдзы алæмæты рæсугъддзинад сæ нкъарæнты баззайы, уый тыххæй.
Хæхты уæвгæйæ, хæлардзинад кæны фидардæр. Ацы хатт дæр та афтæ. Цæгат Ирыстоны паддзахадон университеты æмæ Уæрæсейы туризмы университеты студенттæ æвæстиатæй балымæн сты. Заргæйæ æмæ зæрдæбын ныхæстæ кæнгæйæ уыцы лымæндзинад кæны æнгомдæр. Уæлдайдæр та дæ фарсмæ хорз хæлар куы цæуа, уæд. Иумæйаг тыхтæй басгæрстой æппæтæй тæссагдæр уаццæгтæ.
Экологон къахвæндаг «Цъæйы цъити» райдыдта рæсугъд хох Монахы цур. Йæ дæргъ у 3 километры æмæ 500 метрæй фылдæр. Информацион стенды – бæлвырд хъусынгæнинæгтæ маршруты тыххæй. Рæстæмбис нымадæй туристтæ фæндагыл вæййынц 6 сахаты онг. Скæнынц цалдæр æрлæууæны. Рæстæгæй-рæстæгмæ фæндагыл фенæн вæййы сырх амонæнтæ. Уыдонмæ кæсгæйæ, цъитимæ бахæццæ вæййынц райдайгæ бæлццæттæ, стæй чи бафæстиат, ахæм адæм. Сæйрагдæр у къæрцъхъус уæвын. Фæлæ алкæйы дæр фæфæнды нысанмæ бахæццæ уæвын æмæ рæсугъд къамтæ сисын.
Цæгат Ирыстоны студенттæм æнхъæлмæ каст хъæздыг ирхæфсæн программæ. Хæхтæм балц – уый иу, фæлæ ма лæппутæн æмæ чызджытæн бацæттæ кодтой музейтмæ экскурситæ. Базонгæ сæ кодтой нæ истори æмæ культурæимæ.
Программæмæ гæсгæ ма студенттæн бацæттæ кодтой бирæ ахсджиаг хъуыддæгтæ. Зæгъæм, баххуыс кодтой Фæскомцæдисон парк бафснайыны хъуыддаджы. Уымæй дарддæр фæсивæд бабæрæг кæндзысты волонтерты центр, цæмæй се мкусджытимæ базонгæ уой кæрæдзийы фæлтæрддзинадимæ.
