Алыхуызон ахуырадон фæзты политехнологтæ æмæ медиатренертæ фæсивæдæн бацæттæ кодтой тренингтæ æмæ дæсныйадæвдисæг ахуыртæ
«Фæсивæд: сæрибардзинад æмæ бæрнондзинад». Ахæм сæргондимæ регионты хсæн форум ацыди Дзæуджыхъæуы. Алыхуызон ахуырадон фæзты политехнологтæ æмæ медиатренертæ фæсивæдæн бацæттæ кодтой тренингтæ æмæ дæсныйадæвдисæг ахуыртæ. Мадзæлтты фæлгæты кусын райдыдта ахуырадон проект «Æрыгон политикы скъола». Студенттæ республикæйы сæргълæууæгмæ лæвæрдтой фæрстытæ, базонын сæ фæндыд, политик цавæр миниудждытæй хъуамæ хайджын уа, уый. Сергей Меняйло сын радта бæлвырд дзуапп – политик æмæ патриот – ацы дыууæ миниуæджы хъæуы баиу кæнын, сæйрагдæр та сыгъдæгзæрдæ адæймаг уæвын. Æрныхас кодтой дзырды сæрибардзинадыл дæр.
Форумы архайдтой бæстæйы 20 субъектæй фæсивæд, политехникон æмæ электрон технологиты раззагдæр эксперттæ, республикæйы центрон æмæ территориалон æвзарæн къамисы уæнгтæ. Æвзæрстыты процедурæ бацæттæ кæнынмæ йе ххусы хай чи бахаста, уыдоны схорзæхджын кодтой кады гæххæттытæй æмæ арфæйы фыстæджытæй. Уæрæсейы центрон æвзарæн къамисы уæнг Эльмира Хаймурзина бузныджы ныхæстæ загъта сæ разамонæг Эллы Памфиловайы номæй. Форум баст уыди Цæгат Ирыстоны æвзарæн системæйы 30 азимæ.
