Экспозицимæ хаст æрцыдысты Цæгат æмæ Хуссар Ирыстоны, Кæсæг-Балхъары, Адыгейы æмæ æндæр регионты минæвæртты куыстытæ
Республикæйы нывгæнджыты Цæдисы равдыстыты залы байгом равдыст-конкурс «Нартиада». Экспозицимæ хаст æрцыдысты Цæгат æмæ Хуссар Ирыстоны, Кæсæг-Балхъары, Адыгейы æмæ æндæр регионты минæвæртты куыстытæ. Стыр æргом дзы здæхт æрцыди традицитæ æмæ нырыккон аивады диалогмæ, стæй культурон хæзнатæ хъахъхъæныны фарстатæм. Конкурс арæзт у 4 номинацимæ гæсгæ. Нывты ирдæй зынынц нæ рагфыдæлты цардыуагимæ баст сюжеттæ. Конд сты алы техникæтæм гæсгæ — скульптурæ, графикæ, нывкæнынад. «Нартиада» у уникалон проект æмæ йын бынурæвæрд æрцыди Цæгат Ирыстоны сгуыхт нывгæнæг, скульптор Зæнджиаты Таймуразы хъæппæрисæй, республикæйы нывгæнджыты Цæдисы æххуысæй. Йæ нысан у регионты хицæн жанрты композицитæ сног кæнын æмæ культурон традицитæ бахъахъхъæнын.




