Парламенты æмбырды сфидар кодтой фароны бюджет æххæст кæныны хыгъдлæвæрд
Республикæйы æфтиæгтæ 2022-æм азы уыдысты 55 миллиарды 254 милуан сомы, хæрдзтæ миллиард æмæ рдæг сомы фылдæр. Парламенты æмбырды сфидар кодтой фароны бюджет æххæст кæныны хыгъдлæвæрд. Документ депутатты размæ рахаста финансты министры хæстæ рæстæгмæ æххæстгæнæг Исахъты Олег. Æмбырды ма сфидар кодтой ацы азы бюджетмæ ивддзинæдтæ бахæссыны закъоны проект. Баст сты хæрдзтæ 200 милуан сомæн фæфылдæр кæнынимæ. 100 милуаны нысангонд æрцыд республикæйы Хицауады резервон фонд аразынæн. Уыйбæрц фæрæзтæ ма схардз кæндзысты, сæрмагонд æфсæддон операцийы рæстæг чи фæцæф, уыцы хæстонтæн, стæй чи фæмард, уыцы æфсæддонты æмæ бархионты бинонты уæнгтæн иурæстæгон материалон æххуыс бакæнынæн. Тарниз парахат кæныны рагфæдзæхсты тыххæй закъонмæ ивддзинæдтæ бахæссыны фарстайы тыххæй куы дзырдтой, уæд профилон комитеты сæрдар Реуазты Ларисæ загъта, фарон сывæллæтты хсæн ацы низ кæй фæкъаддæр, фæлæ, æмтгæй райсгæйæ, бæрæггæнæн, раздæрау, у бæрзонд. Йæ хъуыдымæ гæсгæ, хъæуы байгом кæнын тарнизы ныхмæ сывæллæтты санаторий. Уый сæххæст кæнын ис Нузалы рынчындоны бындурыл. Парламенты сæрадр Тускъаты Таймураз куыд загъта, афтæмæй фарста у ахсджиаг, æмæ йыл хъæуы æппæт профилон ведомствæтимæ иумæйагæй бакусын.
