Стыр æргом здахынц канд стыр æнтыстдзинæдтæ райсынмæ нæ, фæлæ ма æнæниз цардыуаг парахат кæнынмæ дæр
Нæ республикæйы æххæст кæнынц ног программæ. Баст у спорты райрæзтимæ 2026-æм азы онг. Стыр æргом здахынц канд стыр æнтыстдзинæдтæ райсынмæ нæ, фæлæ ма æнæниз цардыуаг парахат кæнынмæ дæр. Цавæр уавæртæ ис уый тыххæй Цæгат Ирыстоны, уый базоныныл бацархайдта нæ уацхæссæг Гæджиты Сослан, æмæ йын бакæсæм йæ сюжетмæ.
Раздзоджы скъоладзаутæ шахмæтты сусæгдзинæдтæ цыбыр æмгъуыдмæ базыдтой. Фæлæ ма сын уымæй дарддæр ацы мæйы кæронмæ фадат фæзындзæн сæхи спорты æндæр хуызтæй фæлварынæн. Æххæстæй сын сног кæндзысты се спортивон зал, æмæ дзы архайдзысты футболæй, волейболæй æмæ баскетболæй.
Бындурон цалцæгмæ бавнæлдтой июны. Куыстытæ æххæстгонд цæуынц, федералон программæ «Ахуырад» æххæст кæнæйæ. Уый размæ скъоладзаутæ тренирвкæтæ кодтой аварион бæстыхайы. Фæлæ, кæй зæгъын æй хъæуы, уымæл къултæ æмæ цар, згъæлгæ штукатуркæ хорз уавæртæй не схондзынæ.
Ног зал хъуамæ суа хъæуы спорты рæзты центр. Физкультурæйы уроктæй дарддæр ма ам нысан кæнынц тренировкæтæ кæнын олимпаг спорты цалдæр хуызæй. Уымæн та æмбæлгæ спортивон инвентарь æлхæд æрцыд.
Октябрьскæйы зал сцалцæг кодтой 2 азы размæ. Нырæй фæстæмæ хъæбысæйхæцджытæн фадат ис иу залы канд техникæйыл нæ, фæлæ ма спортивон цæттæдзинадыл æфтауынæн дæр.
Горæтгæрон районы хъæбысхæсты алы хуызтæй секцитæм цæуынц мин сывæллоны онг. Се спортивон цæттæдзинадыл æфтауынц фараст залы. Уыдонæй æхсæз сцалцæг кодтой хæрзæрæджы. Уыимæ рæстæгæй-рæстæгмæ фæхъæздыгдæр кæнынц спортивон кусæнгæрзты къæбиц.
Ныртæккæ нæ республикæйы кусынц спорты рæзты ног программæйыл дыууæ мины дыууын æхсæзæм азы онг. Стыр æргом здахынц канд æнтыстдзинæдтæ райсынмæ нæ, фæлæ ма æнæниз цардыуаг парахат кæнынмæ æмæ спортивон объектты æнцонвадат архайдмæ дæр.
