Йæ саразыныл æмæ йæм бацæттæ кæныныл ныхас цыд организацион комитеты æмбырды
2024-æм азæй фæстæмæ нæ республикæйы арæзт цæудзæн профессионалон дæсныдзинады иумæйаг регионалон конкурс «Цæгат Ирыстоны афæдзы педагог». Йæ саразыныл æмæ йæм бацæттæ кæныныл ныхас цыд организацион комитеты æмбырды. Амыдта йæ Хицауады сæрдары хæдивæг Платы Альбинæ. Ацы азы онг ахæм конкурстæ, куыд «Уæрæсейы хуыздæр ахуыргæнæг», «Уæрæсейы хуыздæр хъомылгæнæг», «Педагогон дебют», «Ирон æвзаг æмæ литературæйы ахуыргæнæг», «Хуыздæр хъомылгæнæг», «Педагог-психолог», «Ахуыргæнæг-дефектолог» æмæ «Афæдзы мастер» нæ республикæйы цыдысты хицæнæй æмæ алы рæстæджыты. Ацы аз та сæ сфæнд кодтам баиу кæнын иумæйаг регионалон конкурсы. Уымæй дарддæр æм хаст æрцæудзысты ног номинацитæ: «Афæдзы разамонæг» æмæ «Къласы хуыздæр разамонæг», – радзырдта ахуырады æмæ наукæйы министры хæдивæг Джанайты Марк. Æдæппæтæй конкурсы уыдзæн 10 номинацийы. Уыимæ ма фыццаг хатт цæудзæн муниципалон æмæ регионалон къæпхæнты æппæт фæлварæнты комкоммæ трансляци. Уæлæмхасæн ахуырады профессионалон дæсныйады республикон конкурс «Мæ зæрдæ лæвар кæнын сывæллæттæн»-ыл дзургæйæ та, бафиппайын хъæуы уый, æмæ 2024-æм азы арæзт цæудзæн хицæнæй, фæлæ «Афæдзы ахуыргæнæгимæ» иу рæстæг. Ацы аз дыууæ дæр райдайдзысты мартъийы. Æмбырды кæронбæттæны Платы Альбинæ Цæгат Ирыстоны Сæргълæууæг Сергей Меняйлойы номæй арфæйы фыстæджытæ радта ахуырады министры хæдивæг Джанайты Маркæн, национ ахуырады æмæ æвзаджы политикæйы хайады разамонæг Нæкуысаты Иринæйæн, стæй Цæгат Ирыстоны паддзахадон базарадон-экономикон колледжы директор Æбиты Валерийæн. Уыцы кады аккаг систы, Æппæтуæрæсеон конкурс «Сколайы хуыздæр хæрæндон»-ы федералон тур иттæг хорз кæй бацæттæ кодтой, уый тыххæй. Уæ зæрдыл уын æрлæууын кæндзыстæм, мадзал нæ республикæйы цыди 2023-æм азы 10-æмæй – 13-æм ноябры онг.
