Абоны онг иу бынатмæ æппæтæй фылдæр конкурс ис Дзæуджыхъæуы электроникæйы колледжы
Республикæйы астæуккаг ахуыргæнæдæтты дарддæр цæуы гæххæттытæ исæн кампани. Абоны онг иу бынатмæ æппæтæй фылдæр конкурс ис Дзæуджыхъæуы электроникæйы колледжы. Раззагдæрты *хсæн ис педагогон колледж дæр. Уым ацы аз 2 хатты фæфылдæр сты бюджетон бынæттæ. Фæзынд дзы ног дæсныйæдтæ дæр.
Хи бацамоныны фæстæ та сæйраг фарст. Цæмæ сфæнд кодта ахуыргæнæг суæвын. Æмæ Виктория Калтурова йæ дзуаппыл æппындæр нæ гуырысхо кæны. 15-аздзыд чызг фидарæй зоны, сывæллæттимæ кусын – йæ курдиат у. Куыд зæгъы, афтæмæй ахуыргæнæндон равзарыныл бирæ хъуыды кæнын нæ бахъуыд. Фæндыд æй æрмæст педагогон колледжмæ.
Æмæ сывæллæттæн зонындзинæдты дунемæ дуар байгом кæнын кæй фæнды, уыдон бирæ сты. Педагогон колледж астæуккаг ахуыргæнæндæтты *хсæн нымад у се ппæтæй парахатдæртæй иуыл. Ацы аз фæзынд фылдæр бюджетон бынæттæ æмæ къабæзтæ. Фыццаг хатт ам ис 2 дæсныйады – «Райдайæн кълæсты ахуыргæнæг мадæлон æвзагыл ахуыр кæныны баримæ» æмæ «Полилингвалон æхсæнады хъомылгæнæг».
Æппæтæй парахатдæр та республикæйы астæуккаг ахуыргæнæндæтты хсæн у электроникæйы колледж. Иу бынатмæ æппæтæй стырдæр конкурс уым ис. Уый та нысан кæны, информацион технологитимæ йæ фидæн сбæттын кæй фæнды, уыцы скъоладзаутæ фылдæр кæй кæнынц, уый. Ацы колледжы абитуриентты нымæц азæй-азмæ рæзы. Æрмæст бюджетон бынæттæ кæй фылдæр кæнынц, уый тыххæй нæ. Колледжы ис, фæсивæдæн цымыдис чи у, бирæ ахæм дæсныйæдтæ.
Ахуыр кæнынмæ кæдæм бацæуой, ууыл мæт кæнын абитуриентты нæ хъæуы. Сæ дуæрттæ сын байгом кодтой се *ппæт ахуыргæнæндæттæ. Алкæцыдæр сæ йæхимæ лвасы куыд йæ кадæй, афтæ бынæттæй дæр.
Колледжты бирæ алыхуызон къабæзтæ ис. Бæрзонд у абитуриентты хсæн ерыс дæр. Æмæ кæд скъоладзауы æцæгдæр фæнды бæлвырд дæсныйадыл ахуыр кæнын, уæд ын уæгъд бынат æнæмæнг разындзæн. Сæйрагдæр у, цæмæй рæзгæ фæлтæр ууыл ахадгæйæ кусын ма зивæг кæной.
