Афæдз æххæстæй нæ рацыд, афтæмæй баивтой Дзæуджыхъæуы доны хæтæлты 25 киллометрæй фылдæр, бафыстой хæстæ, фæфылдæр кодтой кусджыты мызд
Республикæйы донæй ифтонг кæныны куыстуатæн ацы аз уыд ахсджиаг рæстæг. Афæдз æххæстæй нæ рацыд, афтæмæй баивтой Дзæуджыхъæуы доны хæтæлты 25 киллометрæй фылдæр, бафыстой хæстæ, фæфылдæр кодтой кусджыты мызд. Ныр кусынц Южныйы поселочы, ивынц дондзæуæн системæ. Куыстыты цыды тыххæй бæлвырддæр радзурдзæн нæ уацхæссæг Тъехты Элинæ.
Южныйы поселочы дарддæр ивынц дондзæуæн системæ. Длинно-Долинскийы уынджы ныридæгæн баивтой хæтæлты 2 километры. Куыстытæ фæуыдзысты афæдзы кæронмæ. Июны æрдзон фыдбылызы тыххæй поселочы коммуникациты хай нал куыста. Республикæйы донæй ифтонг кæныны специалисттæ æркастысты, знаггад цы бынæттæ баййæфтой, уыдонмæ. Афойнадыл хатдзæгтæ скодтой, цæмæй сæ аиуварс кæной, уый тыххæй. Доны хæтæлтæ баивдзысты 4 километры æмæ рдæг. Ныридæгæн куыстытæ конд æрцыдысты 75 проценты.
Сæйраг хæс – цæмæй нуазыны дон уа сыгъдæг. Реданты донæмбырдгæнæны былгæрæттæ дæр уый тыххæй фæфидардæр кодтой. Терчыбыл доны æмвæзад куы фæфылдæр уа, уæддæр æй дамбæ дарддæр схизын нæ бауаддзæн.
Республикæйы донæй ифтонг кæныны куыстуатæн афæдзмæ бантыст баивын Дзæуджыхъæуы доны хæтæлты 25 киллометрæй фылдæр. Уæдæ ног доны дзыхъхъытæ скъахтой Алханчурты æмæ Архонкæйы дæр. Уымæн æмæ хъæуты цæрджытæ доны тыххæй бирæ азты æййæфтой зындзинæдтæ. Районты филиалтæм та арвыстой техникæйы 15 иуæджы.
Уæдæ бантыст зæронд хæстæ бафидын дæр. Уыдон та сты 200 милуан сомы бæрц. Уымæ гæсгæ зæгъæн ис, æмæ донæй ифтонг кæныны компанийы куыст ахъаз кæны республикæйы цардæн.
