Ног бæрæгбон нысангонд æрцыд 2025-æм азы бæстæйы президент Владимир Путины указмæ гæсгæ
Республикæйы фыццаг хатт сбæрæг кодтой Уæрæсейы мадæлон æвзæгты бон. Ног бæрæгбон нысангонд æрцыд 2025-æм азы бæстæйы президент Владимир Путины указмæ гæсгæ. Цæгат Ирыстоны базарадон-экономикон колледжы арæзт æрцыд кадджын мадзал. Баиу кодта мадæлон æвзæгты ахуыргæнджыты, уæлдæр ахуыргæнæндæтты, æхсæнадон организациты минæвæртты æмæ фæсивæды. Колледжы уыд тематикон радвыст. Студенттæ æмæ кусджытæ бацæттæ кодтой, Уæрæсейы адæмты традицитимæ, культурæтимæ æмæ æвзæгтимæ баст экспозици. Арæзт ма æрцыд æмбырд «Хъахъхъæнæм æвзæгтæ – хъахъхъæнæм культурæ». Дзырдтой æвзаджы ахадындзинады тыххæй национ культурæ, традицитæ æмæ историон намыс бахъахъхъæныны фарстайы. Дарддæр республикон мадзал фæнд кæнынц æрвылаз аразын.
