Уый тыххæй Сергей Меняйло загъта Уæрæсейы æхсæнадон палатæйы цæрæнуæтты-коммуналон хæдзарады æмæ арæзтады къамисы сæрдары хæдивæг Галинæ Дзюбаимæ фембæлды
Республикæйы хицаудзинады оргæнтæ сты цæттæ Æхсæнадон палатæйæн йæ куысты баххуыс кæнынмæ. Уый тыххæй Сергей Меняйло загъта Уæрæсейы æхсæнадон палатæйы цæрæнуæтты-коммуналон хæдзарады æмæ арæзтады къамисы сæрдары хæдивæг Галинæ Дзюбаимæ фембæлды. Уазæг нæ республикæмæ ссыдис форум «Сообществойы» архайынмæ. Цæгат Ирыстоны сæргълæууæджы хæстæ рæстæгмæ æххæстгæнæг куыд бафиппайдта, афтæмæй æхсæнадон цæстдардæн ныртæккæйы царды ис уæлдай ахадындзинад. Цæмæй сæ нысантæ сæ къухы æнцонæй æфтой, уый тыххæй та хъæуы, цæмæй æхсæнадон палатæйы уæнгтæн æххуыс кæной æппæт ведомствæты минæвæрттæ. Бæлвырд дзырдтой, национ проекттæ куыд æххæстгонд цæуынц, уымæ цæстдарды тыххæй, адæмы кæлæддзаг хæдзæрттæй ног цæрæнуæттæм ралидзын кæныны программæйы, бындурон цалцæг æмæ инвалидтæн æнцонархайд тыгъдад саразыны фарстатыл. Уый размæ эксперттæ бабæрæг кодтой бирæуæладзыгон хæдзæрттæ, сывæллæттæн хъазæн фæзтæ, сквертæ, парктæ. Бæрæггæнæн мадзæлттæм гæсгæ профилон министр Таматы Майрæны разамындæй сарæзтой экспертон æмбырд. Галинæ Дзюба республикæйы разамонæгæн радзырдта делегацийы æнкъарæнты тыххæй. Йæ хъуыдымæ гæсгæ, нæ республикæйы уавæр зæрдæхсаинаг нæу, фæлæ дзы ис, бакусын кæуыл хъæуы, ахæм къабæзтæ. Уыдонмæ бахаста дондзæуæн системæтæ, бындурон цалцæг, стæй зæронд хæдзæрттæй ног цæрæнуæттæм ралидзыны программæ. Галинæ Дзюба куыд бафиппайдта, афтæмæй Æхсæнадон палатæ баххуыс кæндзæн уыцы фарстатæ федералон æмвæзадыл алыг кæнынмæ.
