Ахуырдзаутæ рацыдысты иу сценæмæ сæ ахуыргæнджытимæ
Республикæйы культурæйы колледжы адæмон инструментты оркестр радта дзуапдæттæн концерт. Ахуырдзаутæ рацыдысты иу сценæмæ сæ ахуыргæнджытимæ. Ацагъдтой Гæздæнты Булаты, Реуазты Симæйы, Æлборты Феликсы уацмыстæ. Æрыгон музыканттимæ уыдысты зындгонд артисттæ – Дзуццаты Сослан, Хадыхъаты Аллæ, Гæбуты Светланæ æмæ иннæтæ. Концерт арæзт æрцыд Гæздæнты Булаты номыл адæмон инструментты национ оркестры залы. Ахуыргæнæндоны директор куыд загъта, уымæ гæсгæ фæсивæдæн ацы концерт ратдзæн хорз фæлтæрддзинад. Стæй афтæмæй æнгомдæр кæны фæлтæрты бастдзинад.
Томайты Алыксандр, республикæйы культурæйы колледжы 1-æм курсы студент: «Тынг зæрдиагæй архайын ацы къорды. Мæ зæрдæмæ тынг цæуы. Цæгъдын дзы домрæ-басыл. Нæ амонæг у Багаты Розæ æмæ Бутаты Анжелæ».
Æлбегаты Ларисæ, республикæйы культурæйы колледжы директор: «Фыццаджыдæр мæ фæнды зæгъын стыр бузныг. Булат абон гыццыл рынчын у, æмæ ам нæй, фæлæ дирижер Куымæритаты Тенгиз нын уайтагъд ацы галуан радта, цæуыл цæгъдæм, уыцы инструменттæ дæр адоны сты. Æмæ зæгъын, мæ коллективы номæй дæр, мæхи номæй дæр – стыр бузныг сын».
