Цæрджытæн саразынц алыхуызон мадзæлттæ, уыдоны *хсæн – спортивонтæ дæр
Республикæйы социалон лæггæдты хæдзар «Узæлд»-ы æххæстгонд цæуы национ проект «Активон дæргъвæтин цард». Цæрджытæн саразынц алыхуызон мадзæлттæ, уыдоны *хсæн – спортивонтæ дæр. Уыцы-иу рæстæг ма царды уагъд цæуынц ноджыдæр дыууæ проекты. Бæстондæр хабæрттæ радзурдзæн Чехойты Фатимæ.
Йæ гуырæн бон кæмæн вæййы, уыцы адæймагæн йæ райсом райдайы тыхджын къухæмдзæгъдæй. Традици фæзынд 4 азы размæ. Фонд «Старость – в радость»- имæ æмгуыстады руаджы æппæт бæстæйæ волонтертæ æрбарвитынц видеоарфæтæ. Хæдзары нæ ферох кæнынц лæвæрттæ ракæнын дæр. Ам нымайынц – цардмæ хъæлдзæгзæрдæ ахаст у хостæн сæ хуыздæр. Ацы хатт арфæтæ исы Цыбырты Руслан. Хæдзары цæры 2019-æм азæй нырмæ.
Ацæргæ æмæ йе *нæниздзинад хъыгдард кæмæн у, уыцы адæмæн ам арæзт сты æппæт фадæттæ. Национ проект «Активон дæргъвæтин цард» æххуыс у фæлладуадзыны рæстæг алывæрсыгæй æрвитынæн æмæ царды хæрзхъæддзинад фæхуыздæр кæнынæн. Уæлдай цæстдард цæуы спортмæ. Инструктор Дыгъуызты Маринæ хæдзар-интернаты кæд рагæй нæ кусы, уæддæр у физкультурæйы программæйы автор. Хаст æмæ сты йогæ, фитнес, раст улæфты фæлварæнтæ. Кусы, йæ астæуыстæг хъыгдард кæмæн у, уыцы адæмимæ дæр. Ныридæгæн бафиппайдта хорзырдæм ивддзинæдтæ.
Национ проектмæ гæсгæ куыстуаты æххæст кæнынц 2 стыр программæйы. «Стоп деменция» – когнитивон ивддзинæдтимæ адæмæн, «Тактильная забота» та – æвзæр чи уыны, уыдонæн. Цæрджытимæ кусынц профилон специалисттæ. Пайда кæнынц æххуысгæнæн ифтонггæрзтæй. Ам хæдзары дзаумæттæй дæр рауайы тренажертæ.
«Узæлд» хуымæтæг дзырд нæу, фæлæ куысты сæйраг нысан. Республикæйы зæронддæр социалон лæггæдты хæдзар йæ дуæрттæ байгом кодта 1946-æм азы. Ныртæккæ дзы цæрынц 136 адæймаджы. Алы бон дæр ам банкъарын кæнынц, уавæртæ æмæ низтæ нæ хъуыды кæнæгæйæ, царды бонтæ æрвитæн ис хъæлдзæгæй.
«Узæлд»-ы æрмæст æнæниздзинад нæ фидар кæнынц. Ам 80 азы дæргъы алы адæймагæн дæр лæвар кæнынц сæйраг – цæрынæн ныфс.
