Ахæм æнтыстдзинад сæ къухы бафтыд фыццаг хатт
Нæ республикæйы теннисисткæтæ бацахстой дыккаг бынат Цæгат Кавказы федералон зылды чемпионаты. Ахæм æнтыстдзинад сæ къухы бафтыд фыццаг хатт. Афтæмæй чызджытæ равдыстой, тренировкæты æмæ хиуыл бæстон куысты фæрцы спорты бæрзæндтæм схизæн кæй ис, уый. Разæй дæр сæм æнхъæлмæ кæсы егъау цæттæгæнæн куыст – сæхи цæттæ кæнынц Уæрæсейы чемпионатмæ. Куыд сын æнтысы, уый тыххæй радзурдзæн Джыбызты Зæринæ.
4-аздзыд Полинæйы хонынц «Теннисы фидæны стыр стъалы». Гыццыл чызг иттæг хорз æххæст кæны йæ тренеры амындтытæ – уый иу, фæлæ ма зæрдиагæй уарзы спорты ацы хуыз. Дæнцæг кæмæй иса, уый дæр ын ис. Уæвгæ ахæм дæнцæг ис алкæмæ дæр, ацы секцимæ чи цæуы, уыдонæй. Зæгъæм, ацы хатт се ппæт дæр цымыдисæй кæсынц, сыхаг стъолыл цы чемпионты тох бацайдагъ, уымæ. Иринæ æмæ Светæ хæрзæрæджы сыздæхтысты Цæгат Кавказы федералон зылды ерыстæй.
Дыккаг бынат – уый у фыццаг стыр уæлахиз нæ республикæйы иугонд командæйæн. Алы спортсменкæ дæр бакуыста ацы æнтыстдзинадыл. Кæй зæгъын æй хъæуы – цалдæр азы бæстон тренировкæтæ. Елбачиты Иринæ теннисмæ æрбацыд Полинæйы хуызæн хæрзгыццыл чызгæй. Куыд зæгъы, афтæмæй дæнцæг иста йæ фыдæй, у тренер. Абон та æрыгон чызг у спорты мастертæм кандидат, æмæ йæхи бон у кæстæрты ахуыр кæнын. Цæгат Кавказы федералон зылды чемпионаты Ирæ бацахста дыккаг бынат. Йæхи ныхæстæм гæсгæ, ахæм ерысты архайын уыд йæ рагон бæллиц.
Уалдзæджы чызджытæ сæ хъарутæ бафæлвардзысты Уæрæсейы чемпионаты. Уый та нысан кæны уый, æмæ сæ размæ æвæрынц ног хæстæ. Зæгъæм, Ирæйы фæнды спорты мастер суæвын. Ныридæгæн у республикæйы физикон-математикон лицейы сызгъæрин медалисткæ, экономикæйы уæлдæр скъолайы студенткæ, программист, инженер æмæ нанотехнолог. Кæд тынг æнæвдæлон у ахуыры дæр æмæ куысты дæр, уæддæр уыцы-иу рæстæг æппынæдзухдæр архайы спорты.
Ракеткæйæ раст æмæ тагъд архайын – уый иу, иннæмæй та – азарт æмæ цымыдисдзинад. Чи зоны, æмæ спорты ацы хуыз хорз чи нæ зоны, уыдон ахæм миниуджытæ нæ бафиппайдзысты, фæлæ афтæмæй свæййынц чемпионтæ. Стæй, кæй зæгъын æй хъæуы, хиуыл лæмбынæг куыст. Ацы цæхæрцæст фæсивæд цæттæ сты залы сахатгай уæвынмæ. Афтæмæй æфтауынц се спортивон фæлтæрддзинадыл æмæ тырнынц сызгъæрин майдантæм.
