Архайджытæн раарфæ кодта ахуырады æмæ наукæйы министр Алыбекты Эллæ
«Сердце отдаю детям». Уæлæмхасæн ахуырады къабазы кусджыты профессионалон арæхстдзинады республикон конкурс байгом Ногиры 1-æм скъолайы. Архайджытæн раарфæ кодта ахуырады æмæ наукæйы министр Алыбекты Эллæ. Куыд загъта, афтæмæй абон скъолаты æмæ сывæллæтты рæвдауæндæтты уæлæмхасæн ахуырад ахадгæйæ рæзы. Æдæппæтæй ерысы архайы 29 адæймаджы. Сæ арæхстдзинад æвдисынц 8 номнацийы. Алы педагог дæр бацæттæ кодта эссе, хи презентаци, сарæзта дæсныйадæвдисæг ахуыртæ, жюри ма аргъ скодта алы архайæджы уæлæмхасæн ахуырадон программæйæн дæр. Конкурс «Сердце отдаю детям»-ы нысан у, педагогы дæсныйады кад уæлдæр кæнын, уæлæмхасæн ахуырады системæйы курдиатджын педагогты æргом кæнын æмæ сын æххуыс кæнын.
Пагæты Фатимæ, Алагиры районы Пагæты Хъазыбеджы номыл сывæллæтты сфæлдыстады центры уæлæмхасæн ахуырады педагог: «Мæнмæ гæсгæ алы ахуыргæнæн дæр ахсджиаг у ахæм конкурсты архайын. Уымæн æмæ адæймаг йæхимæ æркæсы, цы ивддзинæдтæ ис йæ куысты. Уыдон, æмткæй райсгæйæ, уый вæййы цымыдисаг. Абон нæм цæуы стыр конкурс. Нæхи йæм тынг цæттæ кодтам. Алы ахуыргæнæг дæр, мæнмæ гæсгæ, цыма фыццаг хатт фæархайы, афтæ фæцæттæ кæны йæхи. Ацы конкурстæ тынг пайда сты алы ахуыргæнæгæн дæр хиуыл кусыны тыххæй. Уымæн æмæ педагогикæ алы бон дæр цыдæр ивддзинæдтæ хæссы йæхимæ, æмæ, цæмæй мах дæр æмдзу кæнæм, уый тыххæй кæсын хъæуы, æмæ архайын хъæуы».
