Уыдон фæлварæны хуызы æххæст кæнын райдайдзысты Æрæфы æмæ Алагиры районты
Хъæууон хæдзарад, туризм æмæ промышленность – сты муниципалон скондты социалон-экономикон райрæзтæн ахсджиаг къабæзтæ. Республкæйы сæргълæууæджы разамындæй æмбырды ныхас цыд сæрмагонд проекттыл. Уыдон фæлварæны хуызы æххæст кæнын райдайдзысты Æрæфы æмæ Алагиры районты.
Æрæфы районы сæргълæууæг Лагкуты Омар фæнысан кодта, агропромышленнон комплексы райрæзтæн ахъаз кæй уыдзæн фысты æмæ стурвосы фермæты куыст сног кæнын. Фидæны инвестортæн сбæрæг кодтой хайæдтæ. Цæттæ у æрдзон дуркъахæнты промышленнон проект дæр. Экономикон райрæзтæн хорзыл банымадтой Доныфарсы хъæу. Районы разамонæг ма фæнысан кодта проект царды уадзыны рæстæг лыггæнинаг фарстатæ кæй фæзындзæн, уыимæ национ паркимæ дæр. Республикæйы сæргълæууæг загъта, архайын кæй хъæуы, барадон домæнтæ æххæстгæнгæйæ. Бахъуаджы сахат та федералон ведомстæтимæ æрдзурын.
Проекттæ цæттæ сты Алагиры районы дæр. Афтæ Мызуры равдыстой цалдæр инвестицион фæзуаты. Сæ иу у хуыйæн цех байгом кæнынæн. Хорз гæнæнтæ ис хъæууон хæдзарады къабазы дæр. Афтæ муниципалон сконды бæрны сты фосхизæнтæ æмæ хосгæрдæнтæ. Ис дзы агротуризмы куыст кæнæн. Ацы фарстайы фæдыл Битарты Вячеслав дыууæ районæн бахæс кодта иумæйаг проект саразын æмæ æмгуыстад кæнын. Цæмæй профилон комитетимæ сног уа советон рæстæджы уарзон туристон маршрут.
Республикæйы сæргълæууæг Битарты Вячеслав районты сæргълæуджытæн бахæс кодта, цæмæй сæхæдæг дæр активонæй архайой проект саразыны æмæ фарстатæ лыг кæныны хъуыддаджы. Социалон-экономикон райрæзт рæвдздæр кæм цæудзæн, ахæм территоритæ хъуамæ адæмы раздахой хъæутæм, уыимæ та фæкъаддæр уыдзæн æгуыст адæмы нымæц. Уый тыххæй та хъæуы бынаты фадæттæ аразын. Битарты Вячеслав бахæс кодта, ахæм адæмæн фæлæмæгъдæр кæнын субсидитæ дæттыны фæтк.
