Нымæты национ скъолайы ма проекты автор ахуыр кæны 100 адæймагæй фылдæры
Рохуаты чи баззад, уыцы традицитæ сног кæныны хæс йæ размæ сæвæрдта Бзарты Аланæ. Йе ргом аздæхта нымæт аразыны куыстмæ. Йæ алы дзаума дæр кæны, нырыккон модæ хынцгæйæ. Дзаумæттæй уæлдай ма кæны нымæтæй гауызтæ дæр. Нымæты национ скъолайы ма проекты автор ахуыр кæны 100 адæймагæй фылдæры. Йæ куыст куыд цæуы, уый тыххæй бæстондæр радзурдзæн Тъехты Элинæ.
Нымæт аразынц къуымбилæй. Бзарты Аланæ уыцы куыст кæнын райдыдта 5 азы размæ. Йæ фæндон сæххæст кæнынмæ йын баххуыс кодта президентон грантты фонд. Уый руаджы дыккаг царды фадат фæзынд канд ирон адæмы традицион æрмгуыстадæн нæ, фæлæ ма нымæтын дзаумæттæн дæр. Ирыстойнаг чызг йæ алы куысты дæр арæхстджынæй баиу кæны æнусон традицитæ æмæ нырыккон модæ.
Бзарты Аланæ куыд зæгъы, афтæмæй рагон традицион аивадыл фæбæрæг сты санкцитæ. Ног куыст аразгæйæ чызг архайы æрмæстдæр хорз, фæлæ фæсарæйнаг æрмæгæй. Цалдæр азы йæ æлхæдта Европæ æмæ Австралийы, фæлæ йын ныр уыцы фадат нал ис.
Уыцы зындзинæдтæ нæ хынцгæйæ Бзарты Аланæ йæ дæсныйад ныууадзынмæ нæ хъавы. Йæ куысты хуыз гыццыл баивта æмæ ныр кæны нымæтын гауызтæ. Цы нывтæ сыл аразы, уыдон вæййынц национ хуызы. Сæйрагдæр у, гауызтæ кæнæн æрмæджытæ Уæрæсейы кæй сты, уый.
Ирыстоны нымæты хæдзар у фыццаг æмæ иунæг æппæт дунейы. Проекты автор фæнд кæны арæзтады технологийæн патент райсын. Кæд раздæр нымæт кæныны сусæгдзинæдтæ æргом кодтой æрмæстдæр дзургæйæ, уæд ныр уыцы технологитыл ахуыр кæнынц национ скъолайы. Методикæ азты фæстæ дæр нæ аивта. Хъæугæ кусæнгæрзтæ сты – сапон, дон æмæ къуымбил æууæрдæн фæрæз. Уыцы дæсныйад базонын бафæндыд 100 сылгоймагæй фылдæры. Проекты автор æнхъæл куыд уыд, адæм уымæй фылдæр кæй разындысты, уый тыххæй байгом кодтой национ скъола.
Бзарты Аланæ куыд зæгъы, афтæмæй нымæт кæныны куыст рохуаты уадзæн нæ уыд. Зын у рох традицитæ ног кæнын, фæлæ йын адæмы руаджы æнтысы.
