4 сахатæй фылдæры мгъуыдмæ сценæ сси театры æмæ эстардæйы стъалыты фæз
Евгений Вахтанговы райгуырды 140 азы кадæн мадзæлттæ цæуынц дарддæр. Сæ ирддæр схонæн ис, Сæрибары фæзы цы концерт арæзт æрцыд, уый. Æнæмæнг, баззайдзæн алкæйы зæрдæйы дæр. 4 сахатæй фылдæры мгъуыдмæ сценæ сси театры æмæ эстардæйы стъалыты фæз. Æдæппæтæй 55 ирд æмæ зæрдæмæдзæугæ номыры саив кодтой бæрæгбоны изæр. Аргъ кæмæн нæй, ахæм лæвæрттæ фæндаг ссардтой Дзæуджыхъæуы цæрджыты æмæ уазджыты зæрдæтæм: Лариса Долина, Николай Басков, Таисия Повалий, Мариам Мерабова æмæ Мæскуыйы Евгений Вахтанговы номыл театры æнæхъæн труппæ. Артисттæ адæмы размæ рахастой сæ уарзон зарджытæ. Семæ зарыдысты концерты уазджытæ дæр. Кæд боныхъæд бынтон зæрдæмæдзæугæ нæ рауад, уæддæр никæйы баурæдта. Зард æмæ кафтæй дарддæр ма изæр хъæздыг уыд æмдзæвгæтæй æмæ аив дзырдæй. Ирыстоны номдзыд фырт Хетæгкаты Къостайы æнæмæлгæ рæнхъытæ сценæйæ бакасти Уæрæсейы адæмон артисткæ Ирина Купченко. Уæдæ сфæлдыстадон мадзал хъæздыг уыд æнахуыр дуэттæй дæр. Николай Басков уал раздæр азарыд Лариса Долинаимæ. Уый фæстæ та Вахтанговы театры артисткæтимæ. Зæрдиаг арфæтæ ракодта Дзæуджыхъæуæн, æмæ йæ цæрджытæн. Боныхъæд нæ хынцгæйæ, Сæрибары фæзы æрæмбырд цалдæр мин адæймаджы. Се хсæн – сфæлдыстадон æмæ культурон интеллигенцийы минæвæрттæ æмæ республикæйы разамынд. Концерт фæци хъуыстгонд зарæгæй «Виват, Король». Артисттæ сценæмæ раластой, Евгений Вахтанговæн Мæскуыйы паддзахадон театры раз цы цыртдзæвæн лæууы, уый къопи.