Æппæтуæрæсеон хъазт баиу кодта 400 архайæджы
82 командæйы хсæн 2-аг бынат. Ахæм æнтыстдзинад «Бинонты зарница»-йы финалы бафтыд Алагиры цæрæг Сафаевты бинонты къухы. Æппæтуæрæсеон хъазт баиу кодта 400 архайæджы. Семæ уыдысты сæ разамонджытæ — сæрмагонд æфсæддон операцийы ветерантæ. Бæлвырддæр хабæрттæ радзурдзæн Хъайтмазты Дзерассæ.
Сафаевты бинонтæн Алагирæй «Бинонты зарница» сси сæ тыхтæ иумæ бавзарыны гæнæн. Æппæтуæрæсеон хъазты дыккаг сезоны финалмæ Волгограды облæстьмæ ацыдысты мад Къадзты Зитæ, йæ фаззон-фырттæ Давид æмæ Саид Сафаевтæ æмæ Зитæйы хæрзæфсымæр Хъайтыхъты Ацæмæз. Командæ схуыдтой «Алагир». Финалы бинонты хъуыд бæндæнæй городокыл ацæуын, маскировкæгæнæн хызтæ сбыйын, саразын «Бинонты бæлас» æмæ архайын кулинарон ерысы. Сæйраг фæлварæн сси æфсæддон-тактикон хъазт. Архайджытæ фыццаг медицинон æххуыс кодтой, агуырдтой мæнг минæтæ æмæ æххæст кодтой тактикон хæстæ.
Давид æмæ Саид сты фазæттæ, цæуы сыл фынддæсгай азтæ. Дыууæйæ дæр ахуыр кæнынц кадетон къласы, уымæ гæсгæ сæм уыд, хъазты сæ цы зонындзинæдтæ бахъуыд, ахæмтæ. Се ппæт фæлтæрæнты хицæндзинад уыд æппæт бинонтæй сæ кæй æххæст кæнын хъуыд, уый. Архайджытæ уыдысты кæрæдзиимæ баст: цалынмæ командæйы фæстаг уæнг хæс нæ сæххæст кæна, уыдмæ иннæ къæпхæнмæ рахизæн нæ уыд.
Волгограды облæсты, финал 400 архайæгæй фылдæры баиу кодта æппæт бæстæйæ сæрмагонд æфсæддон операцийы ветерантимæ-зондамонджытимæ. Æппæтуæрæсеон хъазт сарæзтой «Фыдыбæстæ хъахъхъæнджыты» фонд, «Фыццæгты змæлд», «ЮНАРМИЯ» æмæ центр «Воин» Уæрæсейы хъахъхъæнынады министрады æмæ фæсивæды хъуыддæгты фæдыл федералон агентады æххуысæй.
«Бинонты зарница» иу кæны фæлтæртæ æмæ зæрдыл лæууын кæны сæйраг хæзнатæ кæй сты бинонтæ, кæрæдзийæн æххуыс æмæ Фыдыбæстæмæ уарзондзинад.
