Мадзал арæзт цæуы патриотон проект «Мир дому твоему»-йы фæлгæты, сфæлдыстадон къорд «АRТерия» -йы хъæппæрисæй
«Сандро. Наш Сандро» – афтæ схуыдтой, Италийы ныхмæлæуддзинады архайæг æмæ интернационалон æфсæддон Гиоты Барисы фырт Алыксандры кадæн цы киноныв систой, уый. Абон Хъæдгæроны ацæудзæн кинонывы премьерæ. Мадзал арæзт цæуы патриотон проект «Мир дому твоему»-йы фæлгæты, сфæлдыстадон къорд «АRТерия» -йы хъæппæрисæй. Кино фыццаг равдисын снысан кодтой хъæбатыры райгуырæн хъæуы. Уымæй уæлдай йын проект æххæстгæнгæйæ байгом кæндзысты бюст, стæй презентаци уыдзæн Анатолий Виноградовы документалон уацау «Сандро»-йæн. Киноныв сисыны хъæппæрисы атор у Хæблиаты Владислав, продюсер Хъалæгаты Джульеттæ, режиссер Мæхъиты Еленæ. Кинойы цы сюжет æвдисынц, уый 1944-æм азы цыди Италийы. Гиоты Алыксандр Италийы йæхи фæндонмæ гæсгæ нæ разынд. Иннæ уацары уæвджытимæ йæ аластой нацисттæ, æмæ сæ бафтыдтой тыхкуыст кæныныл. Æнхъæлмæ йæм касти мæлæт. Йæ италиаг хæлæртты-коммунистты фæрцы Алыксандрæн бантыст алидзын, æмæ Италийы ныхмæлæуддзинады рæнхъыты дарддæр æххæст кодта йæ службæ. Кино ист у, тохы быдырты чи фæмарди, хæсты фæстæ чи ахицæн йæ цардæй, стæй абон не хсæн чи ис, уыдоны тыххæй.
