Комкоммæ линийы рæстæг республикæйы Сæргълæууæгæн сæ курдиат фехъусын кодта паратеннисæй Уæрæсейы чемпионаты призер Виктор Лагода
Се нæниздзинад хъыгдард кæмæн у, ахæм спортсментæн ма ноджыдæр иу фæз фæзынди Мæздæджы. Комкоммæ линийы рæстæг республикæйы Сæргълæууæгæн сæ курдиат фехъусын кодта паратеннисæй Уæрæсейы чемпионаты призер Виктор Лагода. Спортсмен бирæ азты тренировкæтæ кодта Дзæуджыхъæуы, уый та йын æвзæрын кодта зындзинæдтæ. Ныр ын ахæм фадат фæцис йæ райгуырæн горæт Мæздæджы, æмæ æрмæст уымæн нæ. Бæстондæр радзурдзæн Гуытъиаты Алинæ.
Виктор Лагодæйæн ныр йæ тренировкæтæ райдайынц куыд æмбæлы, афтæ. Уæрæсейы кубокты æмæ чемпионатты призеримæ йæ тыхтæ бафæлварын бирæты фæнды. Æрæджы дæр ма Викторы хъуыдис цæуын Дзæуджыхъæумæ, цæмæй стъолы теннисæй ахъаза, уый тыххæй. Уыцы спорты хуызы профессионалон æмвæзадмæ рацæуын æнцон нæу. Курдиатæй уæлдай ма дзы хъæуы зынаргъ ифтонгарз дæр. Иу стъолы аргъ у сæдæ фæндзай мин сомы. Ацы авналæнтæ Мæздæггаг спортсментæн фæзындысты республикæйы сæргълæууæджы комкоммæ линийы фæстæ. Уæд Сергей Меняйло бæрнон адæймæгтæн бафæдзæхста, цæмæй æвæстиатæй параспортсмены фарста алыг кæной.
Афæдзы æмгъуыдмæ Виктор Лагодæ ссис профессионалон тенниссист. Афтæмæй ссис республикæйы иугонд командæйы онг, сæ астæуыхъæд хъыгдард кæмæн у, уыцы спортсменты æхсæн. Виктор йæхицæн æвæры ног нысантæ æмæ иннæтæн æвдисы, адæймаджы тых куыд æгæрон у, уый.
Спорткомплексы сындæггай аразынц æппæт уавæртæ спортсментæн — æрæджы дзы фæзынд хинайæн, дзаумæттæ ивæн агъуыстытæ, æлхæнынц ифтонгарз.
Æрæджы Виктор иугонд командæйы хыгъды уыдис ерысты Санкт-Петербургы. Уым цæгатирыстойнаг спортсментæ систы турниры призертæ.
Ерыстæм Виктор Лагодæ нырма йæхи цæттæ кæндзæн Дзæуджыхъæуы. Мæздæджы йын аккаг ныхмæлæууæг ныртæккæ нæма ис. Фæлæ гæнæн ис æмæ Мæздæджы, сæ æнæниздзинад хъыгдард кæмæн у, уыцы адæмæн стъолы теннисы скъола куы байгом кæной, уæд Викторæн фæзындзæнис йæхи æмвæзады ныхмæлæууæг.
