Сæрмагонд æргом здæхт цæуы, йе *нæниздзинад хъыгдард кæмæн у, уыцы адæмæн уавæртæ аразынмæ
Сентябры республикæйы 5 районы уыдзæн 19 æвзарæн кампанийы. Хъæлæс кæныны барæй спайда кæнын уыдзæн 34 мин адæймагæй фылдæрæн. Хайæдты хъуамæ уа фадæттæ се ппæтæн дæр. Сæрмагонд æргом здæхт цæуы, йе *нæниздзинад хъыгдард кæмæн у, уыцы адæмæн уавæртæ аразынмæ. Æрæфы районы куыд цæттæ кæнынц æвзæрстытæм, уый тыххæй радзурдзæн Хъайтмазты Дзерассæ.
Хæдзарæй æвзарæн хайадмæ. Цакъоты Дзамболат у инвалид. Цæуы сæрмагонд коляскæйы фæрцы. Æвзæрстыты æдзухдæр фæархайы. Хайæдты, йе нæниздзинад хъыгдард кæмæн у, уыцы адæмæн фадæттæ ис, уый феныны нысанимæ æрбацыдысты Æрæфы районы территориалон æвзарæн къамисы минæвæрттæ. Равзæрстой 3 фæзы. Уыдонæй иу Цыколайы 1-æм скъолайы. Ам ис сæрмагонд пандус, фæлæ йыл æнæ искæй æххуысæй схизæн нæй.
Æвзарæн хайæдтæ ма ис Æрæфы районы культурæйы галуаны æмæ Цыколайы 3-æм скъолайы. Дыууæ дæр пандустимæ æмæ сыл йе нæниздзинад хъыгдард кæмæн у, ахæм адæймагæн йæхи бон у схизын. Хайæдты ма æвæрд ис хъæлæс кæнынæн сæрмагонд кабинкæтæ, сты иннæтæй уæрæхдæр.
Республикæйы 5 районы 10-æм сентябры уыдзысты æвзæрстытæ бынæттон хиуынаффæйады оргæнтæм. Хъæлæс кæныны бар уыдзæн 34 мин адæймагæй фылдæрæн. Æппæтæй стырдæр æвзарæн кампани уыдзæн Æрæфы районы. Ам æвзардзысты муниципалон сконды минæвæртты æмбырды депутатты. Æрæфы районы æвзарæн къамисы сæрдар Тускъаты Эльвирæ куыд загъта, афтæмæй ахсджиаг у, æппæт уавæртæ саразын алы категориты æвзарджытæн.
Йе нæниздзинад хъыгдард кæмæн у, уыдоны удæнцойæн ма самал кæндзысты сæрмагонд транспорт. Автобус æххæст у хæрдмæисæн фæрæзæй. Уый фæрцы адæмæн сæ бон æнæ къуылымпыйæ уыдзæн хайадмæ бахæццæ уæвын.
