Раздæр уал федта центрон рынчындоны уавæртæ, рынчынты исæн хайад, хирургийæ æмæ операцитæгæнæн блок, стæй рынчындоны алфамбылай территори
Сергей Меняйло бабæрæг кодта Горæтгæрон районы æнæниздзинадхъахъхъæнынады æмæ ахуырады объекттæ. Раздæр уал федта центрон рынчындоны уавæртæ, рынчынты исæн хайад, хирургийæ æмæ операцитæгæнæн блок, стæй рынчындоны алфамбылай территори. Аныхас кодта медицинон кусджытимæ. Уыдон ын радзырдтой, сæ мызд 3 къæпхæнæй кæй райсынц, уый, æмæ сæм сæвзæрынц зындзинæдтæ. Сергей Меняйло профилон ведомствотæн бабар кодта фарста цыбыр æмгъуыдмæ алыг кæнын. Республикæйы разамонæг куыд загъта, афтæмæй рахизын хъæуы медицинон картæты электрон системæмæ. Уый зынгæ фенцондæр кæндзæн дохтырты æмæ пациентты æмархайд. Алыг кæнын ма хъæуы иннæ ахсджиаг фарста дæр, ома реанимацийы хайады кæй ис рæуджытæ кусынгæнæн 2 аппараты, уыдонæй иу нæ кусы. Хъуыддаг у банывыл кæнинаг. Сергей Меняйло ма бабæрæг кодта Черменыхъæуы 2-æм æмæ 3-æм скъолатæ. Базонгæ ис, сывæллæттæ цы уавæрты ахуыр кæнынц, уыимæ. Фæстæдæр районы социалон-экономикон рæзты æмæ бюджеты фарстатыл æрныхас кодта бæрнон кусджытимæ.
