Микрорайоны сывæллæттæн сараздзысты дыууæ рæвдауæндоны, поликлиникæ, фехтованийы скъола, футболы манеж, бассейн æмæ æндæр объекттæ
Сергей Меняйло бабæрæг кодта, ныртæккæ кæй аразынц, уыцы микрорайон «Новый городы» арæзтад. Бæлвырд куы æркаст арæзтады уавæрмæ, уæд бауынаффæ кодта, цæмæй микрорайоны цы коммерцион куыстуæттæ саразынмæ хъавынц, уыдоны нымæц фæкъаддæр кæной æмæ сын сæ бæсты саразой, социалон нысаниуæг кæмæн ис, ахæм объекттæ. Микрорайоны сывæллæттæн сараздзысты дыууæ рæвдауæндоны, поликлиникæ, фехтованийы скъола, футболы манеж, бассейн æмæ æндæр объекттæ. Уымæй уæлдай дзы фæзындзæнис æхсæнадон тыгъдадтæ. Уæлдай æргом аздæхтой микрорайоны фæндæгтæ саразыны фарстамæ. Куыстытæ цæуынц паддазхадон программæйы фæрцы. Ныридæгæн уал сæвæрдтой асфальт, бордюртæ, рухсгæнæн цæджындзтæ æмæ дондзæуæнтæ.
