Ууыл ныхас цыд аппаратон æмбырды
Цæгат Ирыстоны Сæргълæууæджы хæстæ рæстæгмæ æххæстгæнæг Сергей Меняйло бабар кодта бæрнон службæтæн, майы бæрæгбæтты рæстæг æнæрлæугæйæ кусын. Ууыл ныхас цыд аппаратон æмбырды. Регионы разамонæг снысан кодта, профилон ведомствотæ се ргом кæмæ хъуамæ аздахой, уыцы сæйраг къабæзтæ. Се хсæн – донивылдтыты æмæ зынгсирвæзтыты ныхмæ мадзæлттæ. Кировы æмæ Мæздæджы районты уавæр хынцгæйæ, ома адæм боныхъæды аххосæй æнæ электрон тыхæй куы баззадысты, уæд Сергей Меняйло электрон тыхуарæг компанитæн бабар кодта карздæр фæткмæ гæсгæ кусын. Уымæй дарддæр регионы разамонæг загъта, муниципалитетты адмнистрацитæ фæлладуадзæн бонты дæр хъуамæ кæй кусой. Ахæм фæтк хъуамæ уа коммуналон службæтæн дæр. Уымæй дарддæр цæст дарын хъæуы санитарон домæнтæ æххæст кæнынмæ.
Стыр æргом аздæхтой Уæлахизы 76 азы бон сбæрæг кæнынмæ дæр. Базилын хъæуы Фыдыбæстæйы Стыр хæсты цыртдзæвæнтæм.
Æмбырды кæронбæттæн Сергей Меняйло байхъуыста æххæстгæнæн хицаудзинады оргæнты разамонджыты дзуапдæттæн докладтæм.
