Федералон бæрнон кусæг республикæйы сæргълæууæгæн радзырдта сæ проекты тыххæй, æмæ загъта, стыр æргом здæхт кæй цæуы рæзгæ фæлтæры психологон, техникон æмæ иумæйаг спортивон цæттæдзинадмæ
Цæгат Ирыстоны Сæргълæууæг Сергей Меняйлойæн кусæг фембæлд уыд Уæрæсейы боксы Федерацийы генералон секреатры хæдивæг, спортивон ахуырадон проект «Бокс — скъолатæм»-ы разамонæг Сергей Игнатьевимæ. Уый ацы бонты ис Дзæуджыхъæуы. Фембæлды ма архайдтой ахуырады æмæ наукæйы министр Алыбекты Эллæ, физкультурæ æмæ спорты министр Хуадонты Артур, стæй боксы Федерацийы президент Дзгойты Константин. Федералон бæрнон кусæг республикæйы сæргълæууæгæн радзырдта сæ проекты тыххæй, æмæ загъта, стыр æргом здæхт кæй цæуы рæзгæ фæлтæры психологон, техникон æмæ иумæйаг спортивон цæттæдзинадмæ. Сергей Меняйло спорты æмæ ахуырады Министрадтæн бабар кодта ацы спорты хуызы элементтæ скъолайы программæмæ бахæссын. Ныртæккæ нæ республикæйы боксæй архайынц 1 мин æмæ 500 æрыгон адæймаджы. Сентябры проект царды уадзын куы райдайой, уæд сæ нымæц зынгæ фæфылдæр уыдзæн, — загъта Дзгойты Константин. Æппæтуæрæсеон проект «Бокс скъолатæм» арæзт у регионалон боксы рæзтмæ, стæй рæзгæ фæлтæры хсæн æнæниз цардыуаг парахат кæнынмæ. Фыццаг хатт программæйыл бакуыстой Татарстаны 2019-æм азы. Ныртæккæ та æнтыстджынæй кусы 180 скъолайы Уæрæсейы 47 регионы.
