Цæгат Ирыстоны Сæргълæууæджы хæстæ рæстæгмæ æххæстгæнæджы хъуыдымæ гæсгæ, республикæйы ирон æвзаджы рæзты фарстатæ сты тынг ахсджиаг
Сергей Меняйлойæн ма кусæг фембæлд уыди национ культурон фарстаты фæдыл республикæйы Сæргълæууæджы уынаффæгæнæг, филологон наукæты доктор, профессор Хъамболты Тамерланимæ. Цæгат Ирыстоны Сæргълæууæджы хæстæ рæстæгмæ æххæстгæнæджы хъуыдымæ гæсгæ, республикæйы ирон æвзаджы рæзты фарстатæ сты тынг ахсджиаг. Куыд регионы разамонæг, афтæ цæттæ у, мадæлон æвзаг бахъахъхъæнынмæ йе вæрæн бахæссынмæ. Цыфæнды адæмыхаттæн дæр йæ сæйраг хъуыддаг у æвзаг. Уый у нацийы культурæйы æнæивгæ хай. Ирон æвзаг фидæны фæлтæртæн бахъахъхъæнын у нæ алкæйы хæс дæр, загъта Сергей Меняйло. Республикæйы æнтыстджынæй кусы ирон æвзаг бахъахъхъæныны къамис. Йæ хыгъды сты республикæйы разамынды, министрадтæ æмæ ведомствæты, æхсæнадон организациты æмæ уæлдæр ахуыргæнæндæтты минæвæрттæ. Сергей Меняйло куыд загъта, афтæмæй къамисы куыстæн разамынд дæтдзæн йæхæдæг. Æххæстгонд цæуы»Ирон адæмы национ-культурон рæзты» паддзахадон программæ. Йæ фыццаг къæпхæн уыди 2018-æм 2020-æм азты, дыккаг къæпхæн та нысан кæнынц 2025-æм азы.
