Æрныхас кодтой студентты æфсæддон ахуырады фарстатыл
Республикæйы сæргълæууæг Сергей Меняйлойæн кусæг фембæлд уыди Цæгат Кавказы хæххон металлургон институты ректоры хæстæ æххæстгæнæг Игорь Алексеевимæ. Æрныхас кодтой студентты æфсæддон ахуырады фарстатыл. Ацы хъуыддаджы фæдыл бадзырд фыст æрцыди Уæрæсейы хъахъхъæнынады, республикæйы хицауады, ЦИПУ-йы æмæ Хæххон металлургон институты хсæн. Запасы сержанттæ æмæ салдæтты кæм цæттæ кæндзысты, уыцы ахуырадон центр кусдзæн ЦИПУ-йы бындурыл. Нырæй фæстæмæ уыдзæни ахуыргæнæндæтты хсæн иумæйаг центр. Игорь Алексеевы ныхæстæм гæсгæ, ацы сæрд институтмæ чи бацæуа, уыцы студенттæ иннæ азæй фæстæмæ ахуыр кæнын райдайдзысты æфсæддон хъуыддаг. Уый тыххæй рагагъоммæ æвзардзысты студентты. Уымæй уæлдай, фембæлды ныхас цыди Цæгат Кавказы федералон институты дарддæры рæзтыл. Институт бакуыста астæуккаг профессионалон ахуырады сæрмагонд курсыл, цæттæ дзы кæндзысты «Мамысон»-ы курортæн кадртæ.