Ныхас цыд коронавирусы инфекци парахат кæнын ма бауадзыныл
Цæгат Ирыстоны сæргълæууæджы хæстæ рæстæгмæ æххæстгæнæг Сергей Меняйлойы разамындæй арæзт æрцыд оперативон штабы радон æмбырд. Ныхас цыд коронавирусы инфекци парахат кæнын ма бауадзыныл. Республикæйы разамонæг куыд бафиппайдта, афтæмæй уæрæсейаг регионты COVID-19-ы диагнозимæ рынчынты нымæц рæзы. Уыимæ се ппæты зæрдыл æрлæууын кодта, куыд ахсджиаг у вакцинаци ацæуын æмæ санитарон домæнтæ æххæст кæнын, уый. Уыцы мадзæлттæ æххæст кæнын хъæуы, цæмæй та Цæгат Ирыстоны цæрджыты сæ хæдзæртты ма бадын кæной, уый тыххæй. Уавæр куы взæрдæр кæна, уæд, нæ республикæмæ чи цæуа, уыдоны дыууæ къуыримæ рвитдзысты карантинмæ. Æппæт хъахъхъæнæн мадзæлттæ куы не ххæст кæнæм, уæд коронавирус кæндзæн парахатдæр, загъта Сергей Меняйло. Уымæй дарддæр республикæйы разамонæг профилон ведомствотæн бабар кодта бакусын пациентты маршрутизацийыл, уæлæмхасæн бынæттæ кæм уыдзæн, уыцы дзæбæхгæнæн-профилактикон уагдæттæ сбæрæг кæнын. Регионы разамонæг ма рынчындæтты хицæуттæй бадомдта амбулаторон куыст фæахадгæдæр кæнын. Оперативон штабы æмбырды рахастой уынаффæ, санитарон домæнтæ æххæст кæнынмæ бæстондæр цæстдарын. Стыр æргом аздахын аэропорты, æфсæнвæндаджы вокзалы æмæ контролон-уадзæн пунктты бæлццæттæм.
