Мадзалы архайдтой Хицауады Сæрдар Тускъаты Таймураз æмæ профилон ведомствæты разамонджытæ
Цæгат Ирыстоны Сæргълæууæджы хæстæ рæстæгмæ æххæстгæнæг Сергей Меняйлойы разамындæй ацыдис, коронавирус парахат кæныны ныхмæ оперативон штабы æмбырд. Мадзалы архайдтой Хицауады Сæрдар Тускъаты Таймураз æмæ профилон ведомствæты разамонджытæ. Медицинон куыстуæтты сæйраг дохтыртæ радзырдтой нæ республикæйы эпидемиологон уавæры тыххæй. Фехъусын кодтой, сæ бæрны цы куыстуæттæ ис, уыдон хостæй æмæ медицинон ифтонгарзæй куыд æххæстгонд сты, уый. Сергей Меняйло бæлвырд æрфарста, дохтырты сæ куысты ныртæккæ фылдæр цы тыхсын кæны, уый тыххæй дæр. Регионы разамонæг бахаста фæндон, цæмæй медицинон куыстуæтты саразой, коронавирусы инфекци кæм бæрæг кæндзысты, ахæм ПЦР-лабораторитæ. Уыцы хъæппæрисыл бакусын бабар кодта Уæрæсейы фæлхасадмæ цæстдарды специалисттæн. Сергей Меняйлойы хъуыдымæ гæсгæ, ахæм лабораторитæ фидæны æххуыс уыдзысты æндæр иртæстытæн.
