Ацы хатт бæрæггæнæн мадзæлттæ сарæзтой скъолаты кæртыты
Скъоладзауты æдасдзинады фарста сæйрагдæрты хсæн ис Адæмон фронты активистты бакусинаг хъуыддæгты хыгъды. Ацы хатт бæрæггæнæн мадзæлттæ сарæзтой скъолаты кæртыты. Куыд сбæлвырд кодтой, афтæмæй бирæтæ дзуапп нæ дæттынц æдасдзинады домæнтæн. Фарста куыд алыг кæнæн ис, уый тыххæй радзурдзæн Фидараты Маринæ.
Æнæзылд цъæх фæзуат, дыууæ турникы, баскетболæй хъазæн фæз, уыимæ йæ уæлцъар нал бæззы, асфальт æскъуыдтæ. Ахæм уавæры цалдæр азы ис Дзæуджыхъæуы 29-æм скъолайы кæрт. Адæмон фронты активисттæ куыд фæбæрæг кодтой, афтæмæй ацы фæзтæ сты æркæсинаг, уымæн æмæ сывæллæтты æнæниздзинадæн сты тæссаг.
Æхсæнадон бæрæггæнæн æркаст æнтыстджынæй нæ ацыдысты цалдæр ахуыргæнæндоны. Се хсæн Дзæуджыхъæуы 33-æм скъола дæр. Кæрдæг æнæ карст æмæ ма бырæттæ. Æхсæнадон кусджытæ се ргом аздæхтой ахуыргæнæндæтты рухсытæм æмæ бырæттæм. Банымадтой сæ æвзæр уавæры. Фæлæ цалдæр хъуыддаджы, экспертты хъуыдымæ гæсгæ сты бынтон æдзæллаг.
Дзæуджыхъæуы 38-æм скъолайы ныртæккæ йæ тæмæны бацыд бындурон цалцæг. Федералон программæ æххæст кæнгæйæ, нысан кæнынц æппæт бæстыхæйттæ сног кæнын, коммуникацитæ æххæстæй баивын. Базилдзысты бæстыхайы æддаг бакастмæ дæр. Сног кæндзысты алцыдæр, скъолайы кæртæй дарддæр. Зæронд турниктæ æмæ футболон фæз æнæ дуар æмæ хызæй. Диркторы ныхæстæм гæсгæ, сывæллæтты ирхæфсæн фæзтæ сног кæнынæн фæрæзтæ нæй.
Скъолайы зæгъынц, территоритæ аив кæныны фарстаимæ сæмбæлдысты цалдæр азы размæ. Дидинæгдонмæ æмæ фæзтæм-иу базылдысты сæхи хъарутæй. Фæлæ рæстæджы ныхмæ тох кæнæн нæй. Сæ зæрдæ дардтой ахуыргæнæндоны бындурон цалцæгыл, фæлæ Дзæуджыхъæуы администрацийы ахуырады Управленийы фехъусын кодтой, скъолаты кæртыты цалцæг федералон æмæ регионалон программæтæм хаст не рцыд.
