Уый фæдыл Адæмон фронты исæнуатмæ цæуынц хъæстытæ æмæ курдиæттæ
Скъоладзауты каникулты рæстæг рабæрæг ахсджиаг фарста — Дзæуджыхъæуы кæртыты нæ фаг кæнынц сывæллæтты ирхæфсæн æмæ спортивон фæзтæ. Уый фæдыл Адæмон фронты исæнуатмæ цæуынц хъæстытæ æмæ курдиæттæ. Президентон змæлды активисттæ рацыдысты радон бæрæггæнæн куыстмæ. Цы сын бантыст базонын, уый тыххæй радзурдзæн Хъайтмазты Дзерассæ.
Сывæллæтты фæз ацы кæрты цыма нæй, афтæ. Зæронд турникты æмæ качелиты уавæр тæссаг у. Уæвгæ, сывæллæтты уый нæ уромы, хистæртæ та алы хатт мæт фæкæнынц, рæзгæ фæлтæр ам куы фæхъазынц, уæд. Весеннийы уынджы 3-æм хæдзары 2-аг корпусы æвзонг цæрджытæ чысыл не сты – 130 адæймаджы онг. Ирхæфсæн бынат та сын нæй. Цалдæр азы размæ адæм горæты администрацимæ курдиат лæвæрдтой, фæлæ уавæр нæ аивта.
Весеннийы уынджы сыхаг хæдзары кæрты дæр качелитæ фылдæр зæронд декорациты хуызæн сты, æмæ уыдонмæ дæр бахæццæ уæвын æнцон нæу. Къæвдаты рæстæг кæрт донæй байдзаг вæййы. Московскийы уынджы 45-æм хæдзары цæрджытæн спортивон фæз сæ бæллиц у. Кæддæр ам уыд футболон фæз, фæстаг 10 азы та – рохуатыуагъд территори. Уыимæ ма æдас дæр нæу.
Сывæллæтты æмæ спортивон фæзты ахæм мониторинг адæмон фронты минæвæрттæ арæх саразынц. Уæлдайдæр та – каникулты рæстæг. Куыд зæгъынц, афтæмæй ацы афон цæрджыты курдиæттæ фылдæр вæййынц. æмæ инспекци куыд æвдисы, афтæмæй хуымæтæджы нæ.
Сывæллæтты фæзты фарста лыггæнинаг у, бирæфатерон хæдзæрттæ кæм ис, ахæм районтæн. æнæмæнг Дзæуджыхъæуы, рæзгæ фæлтæрæн аивгонд фæлладуадзæн бынæттимæ кæртытæ дæр чысыл не сты. Цы риссаг фарстатæ рабæрæг кодтой, уыдон æхсæнадон архайджытæ ратдзысты горæты администрацимæ. Адæмон фронты эксперттæ хъуыддагмæ цæст дардзысты.
