Инспекцион балцы уыд Дзæуджыхъæуы цалдæр объекты
Скъолаты цæттæдзинад ног ахуыры азмæ сбæрæг кодта республикæйы арæзтады æмæ архитектурæйы министр Моргуаты Константин. Инспекцион балцы уыд Дзæуджыхъæуы цалдæр объекты. Ахуыргæнæдæттæ цалцæггонд цæуынц, паддзахадон проект «Ахуырад» æххæст кæнгæйæ. Æдæппæтæй дыууæ азмæ Цæгат Ирыстоны нысан кæнынц 60 скъолайæ фылдæрмæ базилын.
Дзæуджыхъæуы 14-æм скъолайы бындурон цалцæг райдыдта майы. Ам баивтой алцыдæр: бæстыхайы сæр, къултæ, пъолтæ æмæ вентиляци. Зæронд арæзтадæй баззад æрмæстдæр йæ каркас. Ныртæккæ дзы ног кæнынц кълæстæ. Бынаты кусынц суанг дизайнертæ. Къултæ цы хуызæй ахуырст уыдзысты, уый æвзарынц ныййарджытæ дæр. Асинтыл цы пластикон дуæрттæ уыдысты, уыдон баивтой алюминæй кондыл. Афтæ у æдасдæр.
Арæзтады æмæ архитектурæйы министр Моргуаты Константин ахуыры азы райдианы инспекцион балцы уыд горæты скъолаты. Алы ахуыргæнæндоны дæр æххæстæй баивдзысты хæринаггæнæн блок. Балхæндзысты ног кусæнгæрзтæ. Цалцæггæнæн куыстытæ цæуынц 26-æм скъолайы. Чысыл фæстиат кæнынц, уымæн æмæ объект у фарстайаг. Ног ахуыры азмæ сцæттæ уыдзæн æрмæстдæр бæстыхайы галиу фарс.
Къуылымпытæ ам сæвзæрд, коммуникацитæ бауадзыны хъуыддаджы. Бæстыхайы нæй пъадвал. Æппæт дондзæуæн хæтæлтæ цæуынц пъолы бын. Системæ æнæхъæнæй ис кæлæддзаг уавæры.
Дзæуджыхъæуы 39-æм скъолайы та куыстытæ хъуамæ цыдаиккой 2 азы. Фæлæ сæ бантыст цалдæр мæймæ скæнын. Бæстыхай уыд кæлæддзаг уавæры. Йæ сæрæй тагъди. Ныртæккæ та дзуапп дæтты æппæт нырыккон домæнтæн. Ахуырадон процессæн цыдæриддæр хъæуы, уыцы хъæддзаума æлхæд æрцыд. Æвæрынц ма дзы рудзгуытæ æмæ дуæрттæ.
Бындурон цалцæгæн гаранти у 5 азы. Уый, акт куы бафыссой, уыцы мгъуыддæй нымайгæйæ. Зæгъдзыстæм ма уый дæр, æмæ скъолаты бындурон цалцæг цæуы паддзахадон проект «Ахуырад» æххæст кæнгæйæ. Дыууæ азмæ Цæгат Ирыстоны нысан кæнынц 63 ахуыргæнæндоны сног кæнын. Æдæппæтæй уыцы куыстытæн федералон бюджетæй радих кодтой 4 миллиард сомы онг
