Сæйраг призыл тох кæндзысты цыппар командæйы
Сабаты Дзæуджыхъæуы спортивон скъола «Юность»-ы сæйраг фæзы райдайдзæн «Спартак»-ы хъуыстгонд размæбырсæг Нодар Папелишвилийы номарæн турнир. Сæйраг призыл тох кæндзысты цыппар командæйы. Уый, «Юность», «Барс», «Спартак-Алания», стæй Беслæны командæ. Уæ зæрдыл уын лæууын кæнын, Нодар Папелишвили уыди Орджоникидзейы «Спартак»-ы хуыздæр футболисттæй иу. 1969-æм азы «Спартак» фыццаг хатт путевкæ райста Советон Цæдисы чемпионаты уæлдæр дивизионмæ. Уыцы хъуыддагмæ Нодар бахаста æгæрон æвæрæн. Йæ активон архайдæй Дзæуджыхъæуы фæзынд спортивон скъола «Юность», æмæ йын дæсгай азтæ лæвæрдта разамынд. Ныр хæссы легендарон спортсмены ном. Ирыстойнаг командæйы историйы хуыздæр бомбардиры номарæн турнир 2020-æм азæй нырмæ цæуы æрвылаз.
