Турниры архайынц Уæрæсейы 26 регионы минæвæрттæ
Федералон проект «Спорт – норма жизни» æххæст кæнгæйæ, спорты галуан «Манеж»-ы цæуынц аивадон гимнастикæйæ æппæтуæрæсеон æрвылазон ерыстæ «Ступень к Олимпу». Турниры архайынц Уæрæсейы 26 регионы минæвæрттæ. Æвзонг спортсменкæтæ сæ цæттæдзинад æвдисынц къордты архайгæйæ æмæ хицæн программæты. Аивадон гимнастикæйæ турнир цæудзæн 22-æм мартъийы онг. Фидараты Маринæ радзурдзæн бæстондæр.
Уæнгты рог змæлд, граци æмæ тасагдзинад. Ацы миниуджытæ сты – бирæ æмæ ахадгæ тренировкæты хатдзæг. Спортивон командæ «Æвзонг стъалыты» уæнгтæн ахæм æмвæзады ерыстæ сты фыццаг хатт. Алкæцы дæр сæ бæллы олимпаг чемпионкæ суæвынмæ. Æмæ уыцы бæллицмæ цæуынц, уæндон къахдзæфтæ кæнгæйæ. Цæгат Ирыстоны минæвæрттæ сæххæст кодтой дыккаг фæсивæдон разряд, æмæ æппæтуæрæсеон ерысты бацахстой æртыккаг бынат.
Чызджытæ сæхиуыл кусынц æнæрлæугæйæ. Алы бон тренировкæтæ хатгай цыдысты фæндзгай сахаттæ. Фæлæ уæлахизмæ тырнындзинад у æппæтæй сæйрагдæр.
Аивадон гимнастикæйæ Æппæтуæрæсеон ерыстæ арæзт цæуынц ныр æвдæм хатт. Уыимæ афæдзæй-афæдзмæ турниры географи кæны парахатдæр. Дзæуджыхъæуы ерыстæм ссыдысты Уæрæсейы 26 регионы æмæ 45 горæты минæвæрттæ. Се хсæн Мæскуы, Волгоград, Краснодар, Ростов, Оренбург æмæ æндæр горæттæ. Æвзонг спортсменкæтæ канд хицæн программæйы нæ архайынц, фæлæ ма къордгай фæлтæрæнты дæр. Бæрнон тæрхонгæнджытæ та аргъ кæнынц сæ техникæйæн, профессионалон архайдæн, æмæ, кæй зæгъын æй хъæуы, артистизмæн. Турниры сæргонд «Ступень к Олимпу» йæхæдæг йæхиуыл дзуры. Æппæтуæрæсеон ерыстæ аивадон гимнастикæйæ фадат дæттынц стыр фидæнмæ бакъахдзæф кæнынæн.
Спорты галуан «Манеж»-ы турнир байгом кæныны кадджын мадзалы архайдтой парламенты сæрдар Тускъаты Таймураз, спорты министр Гæззаты Юрий, стæй нæ республикæйы аивадон гимнастикæйы федерацийы президент Хабыцты Ларисæ.
Аивадон гимнастикæйæ Æппæтуæрæсеон ерыстæ арæзт цæуынц, федералон проект «Спорт – норма жизни» æххæст кæнгæйæ. Спорты, æвзонгдзинады æмæ рæсугъддзинады бæрæгбон цæуы цалдæр боны, æмæ фæуыдзæн 22-æм мартъийы. Фыццаг уæлахиздзаутæ та ныридæгæн хорзæхджынгонд æрцыдысты майдантæй æмæ дипломтæй.
