Фыццаг æппæтадæмон æмбаладон спортивон хъæзтытæ «Боевое содружество»-йы архайдтой сæрмагонд дæлхайæдты пъæлицæйæгтæ æмæ кусджытæ
Стадион «Динамо»-йы уыдысты ерыстæ Цæгат æмæ Хуссар Ирыстоны мидхъуыддæгты министрадты кусджыты хсæн. Фыццаг æппæтадæмон æмбаладон спортивон хъæзтытæ «Боевое содружество»-йы архайдтой сæрмагонд дæлхайæдты пъæлицæйæгтæ æмæ кусджытæ. Хъусын кæны цæгатирыстойнаг министрады пресс-службæ. Ерыстæм кастысты Цæгат Ирыстоны сæргълæууæджы администрацийы разамонæг Гобеты Ибрагим, республикæйы мидхъуыддæгты министр Андрей Сергеев, Хуссар Ирыстоны мидхъуыддæгты министр Гуыцмæзты Алан, стæй зындгонд спортсментæ, æхсæнадон æмæ ветеранты организациты минæвæрттæ. Ерысты арт ссудзыны кадджын бар лæвæрд æрцыд, уæгъдибар хъæбысхæстæй олимпаг чемпион Рæмонты Сосланæн æмæ пауэрлифтингæй дунейы кубок рамбулæг, Европæйы 2 хатты чемпион Икъаты Сæрмæт. Архайджытæ сæ тыхтæ бавзæрстой уæзæгтæ исыны спорты, хæстон комплекттимæ эстафетæты, хи хæрдмæ ивазыны, спринтерон дугъты æмæ кроссты, стæй бæндæн ивазыны. Ерыстæ æххæстгæнгæйæ ма, арæзт æрцыд мини-футболæй турнир дæр. Командæты хыгъдмæ бацыдысты 2 республикæйы мидхъуыддæгты министрады алыхуызон дæлхайæдты разамонджытæ. Уæззау атлетикæйæ ерысы хуыздæр сси Цæгат Ирыстоны командæ, рог атлетикæйæ æмæ сæрмагонд дæлхайæдты хсæн ныхмæлæуды фыццаг бынæттæ бацахстой Хуссар Ирыстоны минæвæрттæ. Футболон матч та ахицæн 3:3 хыгъдæй.
