Фыццаг хатт сæ тыхтæ бафæлвæрдтой футболæй æмæ мысан æхсынæй ерысты
Стыр Уæлахизы 76 азы бонмæ сæхи иттæг хорз бацæттæ кодтой Слестгæнæн комитеты кусджытæ дæр. Фыццаг хатт сæ тыхтæ бафæлвæрдтой футболæй æмæ мысан æхсынæй ерысты. Уыимæ дзы архайдтой æрмæстдæр ведомствойы кусджытæ. Футболон фæзмæ рацыдысты Цæгат Кавказы федералон зылды æппæт регионтæй 8 командæйы. Турнир арæзт æрцыд къордгай системæмæ гæсгæ. Фыццаг матчтæй фæстæмæ Цæгат Ирыстоны командæ равдыста, турниры лидертæм кæй хауы, уый. Фыццаг фембæлды не мзæххонтæ фæуæлахиз сты Цæцæны командæйыл. Турнир цыди дыууæ боны. Финалы цæгатирыстойнæгтæ разындысты тыхджындæр, æмæ рамбылдтой Кæсæг-Балхъары футболистты дæр.
Футболæй ерыстæй дарддæр ма Слестгæнæн комитеты кусджытæ сæ тыхтæ фæлвæрдтой мысан æхсынæй. Ам та хуыздæр коллективыл нымад æрцыд Кæсæг-Балхъары командæ. Дыккаг бынат бацахстой Цæгат Ирыстоны минæвæрттæ. Дагестаны командæ та, куыд футболы, афтæ мысан æхсыны ерысты дæр систы æртыккæгтæ. Зæгъын хъæуы уый дæр, æмæ хицæн ерысты фыццаг бынат бацахста ирыстойнаг лæппу Къуымæллæгкаты Зауыр. Слестгæнæн комитеты кусджыты хсæн радон ерыстæм бирæ æнхъæлмæ кæсын нал хъæудзæн, зæгъынц сæ аразджытæ. Фæлæ ма уымæй дарддæр рæстæгæй-рæстæгмæ фæархайынц алыхуызон ведомствоты хсæн турнирты, æмæ равдисынц хорз бæрæггæнæнтæ.
