Сæрмагонд кабинетты ахуыртæ уыдзæн химийæ, биологийæ, физикæйæ æмæ технологийæ
Суададжы астæуккаг скъолайы байгом «Точка роста». Сæрмагонд кабинетты ахуыртæ уыдзæн химийæ, биологийæ, физикæйæ æмæ технологийæ. Ахуырады центры сæ зонындзинæдтæ фылдæр кæндзысты 8-æй 11-æм кълæсты онг скъоладзаутæ. Рæзгæ фæлтæрæн цавæр уæлæмхасæн гæнæнтæ фæзынд, уый тыххæй радзурдзæн Хъайтмазты Дзерассæ.
Гогаты Батраз химикон реагенттимæ дæсныйæ архайы. 8-æм къласы ахуырдзауæн йæ бон у равдисын, слайм скæнын куыд ис, уый. Точка роста гом кæны ног гæнæнтæ. Сæйрагдæр у, зонындзинæдтæ исынмæ тырнын. Æмæ Суададжы скъоладзаутæ ацы хъуыддагмæ нæ зивæг кæнынц.
Гогаты Батраз, Суададжы скъолайы 8-æм къласы ахуырдзау: «Бирæ фылдæр нæ къухы бафтдзæн. Ацы станцæты руаджы иртæстытæ кæндзыстæм. Нæ бон уыдзæн хуыздæр ахуыр кæнын. Рагæй мæ фæндыд, цæмæй нæм Точка роста байгом уа. Алагиры олимпиадæйы историйæ. Федтам сын сæ точка роста, сæ гæнæнтæ. Мах дæр фæндыд цæмæй нæ скъолайы уа ахæмтæ».
Суададжы скъолайы «Точка роста» бацахста 2 кабинеты. Æххæст сты нырыккон ифтонггæрзтæй. Химийæ, биологийæ æмæ физикæйæ ахуыртæ ныр суыдзысты цымыдисагдæр. Уымæй уæлдай ма сывæллæттæн сæ бон у робототехникæйæ архайын дæр.
Персаты Алена, Суададжы скъолайы биологийы ахуыргæнæг: «Райстам ног ифтонггæрзтæ биологийæ, экологийæ. Сывæллæттæн сæ бон у сæ фæрцы иртасæн куыст кæнын».
Сырх лент алыг кæныны бар радтой бынæттон администрацийы сæргълæууæгæн. Уымæн æмæ уый ахсджиаг цау у, канд скъолайæн нæ, фæлæ æнæхъæн хъæуæн дæр.
Брытъиаты Тамерлан, Суададжы администрацийы сæргълæууæг: «Бузныг алкæмæндæр, уыдон чи æрхъуыды кодта, уыдонæн. Нæ ахуыргæнджытæ махæн сты тынг хорз. Скъоладзаутæ нæм бирæ нæй, фæлæ иууылдæр сты тынг хорз. Ахуыр дæр кæнын тынг хорз».
Центры ахуыр кæндзысты 8-æй 11-æм къласы онг скъоладзаутæ. Уыдзæн сын, проектон куыст кæныны фадат дæр.
Козаты Зауыр, Суададжы скъолайы директор: «Мæнæ нын радтой ног æрмæг. Уыдоныл нæ сывæллæттæ кусгæ дæр никуы кодтой. Ныр сын фадат фæзынд уыцы куыст уыдзæн урокты дæр, фæлæ сæрмагондæй та фæсурокты. Семæ кусдзысты æрмсæт нæхи ахуыргæнджытæ нæ, фæлæ ма районы цы центр ис, уырдыгæй дæр нæм хъуамæ ахуыргæнджытæ цæуой, æмæ уыдон дæр архайой».
Суададжы «Точка роста» байгом федералон программæ «Нырыккон скъола»-мæ æмæ национ проект «Ахуырад»-мæ гæсгæ. Уыдон æххæстгæнгæйæ центры кабинеттæм балхæдтой ифтонггæрзтæ 2 милуаны æмæ 500 мин сомы бæрцæн.
Суададжы скъоламæ ацы ахуыргæнæндонæй уæлдай ма хауы 2 филиалы. Иу Ногхъæуы. Уым точка роста байгом фарон. Ноджы дæр ма иу центр та баæгом уыдзæн иннæ аз Хæтæлдоны филиалы.
