Профориентацион фæлтæр саразæг ныр 8-æм аз у республикæйы мыхуыры хъуыддæгты æмæ дзыллон коммуникациты комитет.
Каникултæ пайдаимæ. Сывæллæттæн фадат фæци сæхи уацхæссæджы, амонæджы, редакторы æмæ операторы бынаты бафæлыварынæн. Сывæллæтты дзæбæхгæнæн лагерь «Звездочкæ»-йы йæ куыст райдыдта æвзонг журналисты скъола. Профориентацион фæлтæр саразæг ныр 8-æм аз у республикæйы мыхуыры хъуыддæгты æмæ дзыллон коммуникациты комитет. Алы бон дæр сывæллæттæ æмбæлынц Цæгат Ирыстоны зындгонд журналисттимæ æмæ медиа-къабазы минæвæрттимæ. Уыдон сын кæнынц алывæрсыг дæсныйадæвдисæг ахуыртæ. Бæлвырддæр хабæрттæ радзурдзæн Фидараты Маринæ.
Ацы сабитæй бирæтæ ныридæгæн зонынц, телевизион журналистикæ цæмæй арæзт у, уый. Æмæ канд уый нæ. Лæппутæ æмæ чызджытæ уæндонæй архайынц микрофонимæ, егъау аудиториимæ кусыны. Уæвгæ, ацы лæппутæй æмæ чызджытæй цалдæрæй журналистикæимæ раздæр базонгæ сты. Архайдтой алыхуызон тематикон къордты.
Æрыгон æмкусджытæн ахадгæ æххуыс кæнынц фæлтæрдджын журналисттæ. Се ххуысы фæрцы фæлварынц сæ зонындзинæдтæ.
Телеуынынады фидæны кусджытæ исынц сæ фыццаг репортажтæ, интервьютæ æмæ фыссынц текстытæ. Раст зæгъгæйæ сын ацы мадзал стыр æххуыс у сæ курдиат раргом кæнынæн.
Ам та æрбынат кодта æртæ телеканалы коррпункт. Ныхас дзы кæнынц хабæрттæ æмбырд кæныны традицион методтыл, стæй нырыккон медиапълантæ аразыныл. Разæй сæм æнхъæлмæ кæсынц дæсныйадæвдисæг ахуыртæ оператортæй, монтажертæй, продюссертæй, редактортæй æмæ рауагъдадты разамонджытæй. Скъоладзаутимæ аныхас кæндзысты профессионалон спикертæ. Уæвгæ лагеры цард у хъæздыг æмæ мидисджын. Дискотекæтæ, концерттæ, гитарæйы цагъдмæ гæсгæ зарджытæ.
Медиа кэмп канд журналистикæимæ баст нæу. Туристон балцытæ, хъæлдзæг спортивон ерыстæ. Иу дзырдæй дзы æнкъард кæнынæн рæстæг нæй. Стыр æргом здæхт цæуы сывæллæтты фæлладуадзæн рæстæгмæ.
Фæлæ уæддæр лагеры сæйрагдæр темæ у профессионалон ориентаци. Ахуырадон программæ дзуапп дæтты æппæт нырыккон домæнтæн. Иумæйагæй сыл бакуыстой республикæйы мыхуыры хъуыддæгты æмæ дзыллон коммуникациты комитет, стæй уæлæмхасæн ахуырады психологтæ æмæ педагогтæ. Æвзонг журналисттæм разæй æнхъæлмæ кæсынц цымыдисаг дыууæ къуырийы. Райсдзысты фæлтæрддзинад æмæ сæхи бафæлвардзысты фидæны дæсныйады.
