Ансамбль акодта Дагестайнаг æмæ «Чызджыты кафт»
Сывæллæтты кафджыты къорд Архонкæйæ бацахста фыццаг бынат кадджын æппæтадæмон конкурсы Мæскуыйы. Ансамбль акодта 2 композицийы – Дагестайнаг æмæ «Чызджыты кафт». Ахæм стыр балцы æвзонг артисткæтæ фыццаг хатт уыдысты, уымæ гæсгæ сын ацы уæлахиз уæлдай зынаргъ у. Разæнгард сæ кæны, ног бæрзæндтæм схизынмæ. Сфæлдыстадон коллективы тыххæй бæлвырддæр радзурдзæн Хъайтмазты Дзерассæ.
Чызджытæ архайынц алы змæлд дæр рафæлхатын. Гуссауты Дианæ Архонкæйы кафджыты студийы хореографи амоны 3-аг аз. Мартъийы къорд сси æппæтадæмон кадджын премийы лауреат культурæйы æмæ аивады къабазы.
Конкурс FossArt уыд Мæскуыйы 7-æй 10-æм мартъийы онг. Къорды чызджытæн уый уыд фыццаг балц. Æнтыстджын цæттæдзинад, 2 конкурсон боны, сæдæгай архайджытæ, æмæ сæйрагдæр – сценæмæ рахызт.
Æвзонг артисткæтæ сæ арæхстдзинад равдыстой «Национ культурон традицитæ бахъахъхъæныны» номинацийы. Бацæттæ кодтой Дагестайнаг æмæ «Чызджыты кафт». Фыццаг архайд конкурсы æмæ фыццаг уæлахиз. Уый сæ разæнгард кæны сæхиуыл фылдæр кусынмæ æмæ адæмон кафты сусæгдзинæдтæ арфдæр базонынмæ.
Аннæйы ныхæстимæ разы сты се ппæт чызджыты дæр. Фæнды сæ кафты стыр бæрзæндтæм схизын. Æмæ цалынмæ сæ фарсмæ сæ уарзон ахуыргæнæг ис, уæдмæ дызæрдыггаг нæу, алцыдæр сæ къухы бафтдзæн.
